នេះគឺជាដំណឹងល្អមួយសម្រាប់អ្នកអវកាសដែលនឹងឡើងទៅកាន់ភពអង្គារ ព្រោះថាពួកគេអាចដាំបន្លែបាននៅទីនោះ មិនចាំបាច់ពឹងលើជំនួយពីផែនដី។
ក្រុមអ្នកវិទ្យាសាស្ដ្រទើបតែបានបង្ហាញភ័ស្ដុតាងថា ពួកគេបានជោគជ័យក្នុងការដាំបន្លែនៅលើដីដូចភពអង្គារ ហើយបន្លែទាំងនេះអាចហូបបានដូចធម្មតា។
ក្រោយពីការដាំ និងថែទាំ ក្រុមអ្នកវិទ្យាសាស្ដ្រនៃសកលវិទ្យាល័យ Wageningen ហូឡង់ បានប្រមូលផលបន្លែ ១០ប្រភេទ រួមមានទាំងស្ពៃមើម ប៉េងប៉ោះ ស្ពៃក្រញាញ់ និងស្រូវសាឡីខ្មៅ។ល។
បន្ទាប់ពីបានពិសោធ ក្រុមអ្នកវិទ្យាសាស្ដ្របានរកឃើញថា ដំណាំទាំងនេះ មិនមានផ្ទុក លោហ ធាតុដែលគ្រោះថ្នាក់ដល់សុខភាពនោះទេ។ ប្រការនេះ ធ្វើឱ្យគេនឹកឃើញដល់ទិដ្ឋភាពដំណាំនៅភពដទៃដូចខ្សែភាពយន្ត The Martian។
សណ្ដែកដែលដាំនៅលើភពអង្គារ គឺល្អជាងសណ្ដែកនៅលើឋានព្រះចន្ទ
Wieger Wamelink អ្នកវិទ្យាសាស្ដ្រម្នាក់មកពីសកលវិទ្យាល័យ Wageningen និងជាប្រធានក្រុមស្រាវជ្រាវ ឱ្យដឹងថា ៖ “លទ្ធផលដែលទទួលបានគឺពិតជាមានក្ដីសង្ឃឹម។ យើងអាចហូបបន្លែ សណ្ដែក ស្រាវសាឡីខ្មៅ និងប៉ែងប៉ោះ ដូចធម្មតា”។
ក្រោយពីប្រមូលផល និងពិសោធ បង្ហាញថា បន្លែទាំងនេះ មិនមានផ្ទុកលោហធាតុនោះទេ
ដូច្នេះ ចាប់ពីពេលនេះតទៅ មនុស្សនឹងមិនបាច់ព្រួយបារម្ភអំពីប្រាក់កាសដែលត្រូវចំណាយក្នុងការបញ្ជូនអាហារ ទឹកឡើងទៅឱ្យមនុស្សនៅភពអង្គារនោះទេ ព្រោះអ្នកដែលនឹងទៅរស់នៅលើភពអង្គារ អាចដាំស្រូវ និងបន្លែដោយខ្លួនឯងបាន។
ការពិសោធរបស់ NASA បង្ហាញថា ដីនៅលើភពអង្គារ មានជីជាតិប្រហាក់ប្រហែលនឹងដីនៅលើភពផែនដី
សូមបញ្ជាក់ថា ការដាំដំណាំខាងលើនេះ មិនមែនយកដីពីភពអង្គារនោះទេ ប៉ុន្តែគេយកដីពីរបស់ ផែនដីដែលមានលក្ខណៈដូចទៅនឹងដីនៅលើភពអង្គារ ហើយជោគជ័យនេះបានធ្វើឱ្យអ្នកវិទ្យាសាស្រ្ដមានការពេញចិត្តជាខ្លាំង។
ប្រែសម្រួល ៖ តារា