(ម៉ានីល)៖ នៅបន្ទាប់ពីបានស្បថជាមួយព្រះជាម្ចាស់ ថាខ្លួនឈប់ប្រើពាក្យជេរប្រមាថមិនទាន់ទំាងបានមួយខែផង ប្រធានាធិបតីហ្វីលីពីន លោក រ៉ូឌ្រីហ្គោ ឌូធើតេ បានជេរសហរដ្ឋអាមេរិកសារជាថ្មីម្ដងទៀតដោយចាត់ទុកថា អ្នកដែលនៅពីក្រោយការសម្រេចចិត្តបញ្ឈប់ការលក់កំាភ្លើង២៦,០០០ដើម ដល់ហ្វីលីពីនគឺជា «មនុស្សល្ងីល្ងើ» និង «សត្វស្វា» ហើយលោកថា នឹងទិញអាវុធពីចិន និងរុស្ស៊ីវិញ នេះបើយោងតាមការចុះផ្សាយ របស់សារព័ត៌មាន Reuters នៅយប់ថ្ងៃ ពុធ ទី០២ ខែវិច្ឆិកា ឆ្នាំ២០១៦។
ថ្លែងនៅក្នុងសុន្ទរកថាតាមកញ្ចក់ទូរទស្សន៍ លោក ឌូធើតេ បានលើកឡើងដូច្នេះថា «មើលស្វាទំាងនេះចុះ! កាំភ្លើង២៦,០០០ដើម ដែលយើងចង់ទិញ ពួកគេបែរជាមិនចង់លក់ឱ្យយើងទៅវិញ។ កូនមីសំផឹង! យើងមានកាំភ្លើងជាច្រើន នៅទីនេះ អាឆ្កួតអាមេរិក ហើយយើងអាចទិញកាំភ្លើងពីរុស្ស៊ីនិងចិនក៏បានដែរ»។
ការផ្ទុះកំហឹងឡើងវិញរបស់លោកឌូធើតេ កើតឡើងតែមួយថ្ងៃប៉ុណ្ណោះ នៅបន្ទាប់ពីក្រសួងការបរទេសអាមេរិកកាលពីថ្ងៃអង្គារ សម្រេចផ្អាកគំរោងលក់កាំភ្លើងប្រមាណជា ២៦,០០០ដើម ទៅឲ្យប៉ូលិសជាតិហ្វីលីពីនដោយសារតែការរំលោភសិទ្ធិមនុស្ស ខណៈមនុស្សច្រើនជាង២៣០០នាក់ បានស្លាប់បាត់បង់ជីវិត នៅក្នុងសង្រ្គាមប្រឆាំងគ្រឿងញៀនរបស់ប្រធានាធិបតីហ្វលីពីនរូបនេះ៕
ប្រភព ៖ រ៉យទ័រ