អង្គការរដ្ឋអ៊ីស្លាមចេញមុខទទួលខុសត្រូវលើការវាយប្រហារដោយគ្រាប់បែកនៅតំបន់ពាណិជ្ជកម្មមួយក្នុងរដ្ឋធានី Baghdad នៃប្រទេសអ៊ីរ៉ាក់ បណ្ដាលឱ្យមានមនុស្សស្លាប់យ៉ាងតិច ១៧នាក់។
ក្រុម ISIS នៅក្នុងក្រុង Mosul
អង្គការរដ្ឋអ៊ីស្លាម ISIS ប្រកាសថា បណ្ដាឧទ្ទាមបំផ្ទុះគ្រាប់បែកអត្តឃាតពាក់អាវដែលបំពាក់ទៅដោយជាតិផ្ទុះ កាលពីម្សិលមិញ បានវាយប្រហារទៅលើតំបន់ Baghdad al-Jadida ភាគខាងកើតក្រុង Baghdad និង Bayaa នៅភាគខាងត្បូងប្រទេសអ៊ីរ៉ាក់។ តំបន់ទាំងនេះ សម្បូរដោយអ្នកកាន់សាសនាអ៊ីស្លាម និកាយ Shiite។
AFP ដកស្រង់សំដីរបស់មន្ដ្រីសន្តិសុខ និងសុខាភិបាលអ៊ីរ៉ាក់ ឱ្យដឹងថា យ៉ាងហោចមានមនុស្សស្លាប់ ១៧នាក់ ក្នុងនោះ ៨នាក់ស្លាប់នៅ Baghdad al-Jadida និង ៩នាក់ស្លាប់នៅ Bayaa។
ក្រុម ISIS និងក្រុមអ៊ីស្លាមនិកាយ Sunni បានចាត់ទុកក្រុមអ៊ីស្លាមនិយាយ Shiite ថាជា “សាសនាចម្លែក” ។ ISIS តែងតែវាយប្រហារទៅលើប្រជាជនសាមញ្ញ នៅក្នុងតំបន់ដែលមានអ្នកកាន់សាសនាអ៊ីស្លាមនិកាយ Shiite ក្នុងក្រុង Baghdad។
ក្រុម ISIS ក៏បានទទួលខុសត្រូវចំពោះការវាយប្រហារដោយគ្រាប់បែកនៅភាគខាងលិចក្រុង Baghdad កាលពីថ្ងៃទី ២៥កញ្ញា ដែលបានសម្លាប់មនុស្ស ៦នាក់ ហើយមុននោះមួយថ្ងៃ ក្រុម ISIS បានបើកការវាយហារដោយកាំភ្លើង និងគ្រាប់បែកនៅក្នុងតំបន់ Tikrit ភាគខាងជើងក្រុង Baghdad បណ្ដាលឱ្យមានមនុស្សស្លាប់១២នាក់។
សមត្ថកិច្ចនៅក្នុងតំបន់ Baghdad al-Jadida ដែលមានភេរវកម្មបំផ្ទុះគ្រាប់បែកអត្តឃាត
កងទ័ពអ៊ីរ៉ាក់ កំពុងតែត្រៀមវាយប្រហារទៅកាន់ Mosul ដែលជាទីក្រុងចុងក្រោយដែលកំពុងត្រូវបានគ្រប់គ្រងដោយក្រុម ISIS បន្ទាប់ពីដណ្ដើមបានតំបន់មួយចំនួនពីពួកឧទ្ទាមនេះ។ ប៉ុន្តែ ក្រុម ISIS នៅតែមានលទ្ធភាពវាយប្រហារទៅលើទីតាំងនានាដែលគ្រប់គ្រងដោយរដ្ឋាភិបាលអ៊ីរ៉ាក់។
ប្រែសម្រួល ៖ តារាប្រភព ៖ IBTime