ភ្នំពេញ ៖ ក្មេងស្ទាវ ដែលចូលចិត្ដជិះម៉ូតូ ប្រដេញគ្នា បានជួបថ្ងៃស៊យ បន្ទាប់ពីពួកគេ បានជិះម៉ូតូទៅបុកគូទរថយន្ដមួយគ្រឿង បណ្ដាលឱ្យរងរបួស ធ្ងន់ ត្រូវបានបញ្ជូនទៅ កាន់មន្ទីរពេទ្យភ្លាមៗ រីឯម៉ូតូរងការខូចខាត ស្ទើរទាំងស្រុង ។
គ្រោះថ្នាក់ចរាចរបច្ចុប្បន្ន ដែលបាននឹង កំពុងកើនឡើង គួរឱ្យភ័យខ្លាច ហើយសម្លាប់ មនុស្សនិងរងរបួសជាច្រើននាក់ ត្រូវបានមន្ដ្រីនគរបាល ចរាចរណ៍ជើងគោកអះអាងថា ក្រុមក្មេងស្ទាវជាក្រុមប្រឈមមុខមួយ តែងតែបង្កគ្រោះថ្នាក់ចរាចរ ក្រៅពីការផឹកគ្រឿងស្រវឹង ពួកគេបានបើកបរ ដោយគ្មានការប្រុងប្រយ័ត្ននិងក្នុងល្បឿនលឿន ។
ជាក់ស្ដែងកាលពីវេលាម៉ោង១និង៤០ នាទីយប់រំលងអាធ្រាត្រឈានចូលថ្ងៃទី០៤ ខែមីនា ឆ្នាំ២០១៣ ក្រុមក្មេងស្ទាវចំនួន២ ម៉ូតូ មួយគ្រឿងម៉ាក ហ្វីណូ ជិះគ្នា៣នាក់ ពាក់ស្លាកលេខភ្នំពេញ 1T-5945 និងមួយ គ្រឿងទៀត ម៉ាកស្កុបពី បានជិះប្រដេញគ្នា យ៉ាងលឿន នៅលើកំណាត់ផ្លូវព្រះស៊ីសុវត្ថិ លុះដល់ចំណុចកើតហេតុ កែងផ្លូវលេខ១១៨ ពួកគេបានបុករថយន្ដម៉ាកអាតូសមួយគ្រឿង បណ្ដាលឱ្យដួល ក្រងាប់ច្រងិល រងរបួសធ្ងន់ ត្រូវបានដឹក បញ្ជូនទៅកាន់មន្ទីរពេទ្យភ្លាមៗ រីឯម៉ូតូរបស់ពួកគេ បានរងខូចខាតស្ទើរទាំង ស្រុង ។
យោងតាមប្រភពព័ត៌មានពីសមត្ថកិច្ច មូលដ្ឋានបានឱ្យដឹងថា មុនពេលកើតហេតុ គេបានឃើញក្រុមក្មេងស្ទាវទាំងនេះ បាននាំ គ្នាជិះម៉ូតូឌុបគ្នា ក្នុងល្បឿនយ៉ាងលឿនឆាប ចុះឡើងៗ លុះពេលបើកមកដល់ចំណុចកើត ហេតុ ក៏ជ្រុលទៅបុកគូទរថយន្ដ បណ្ដាលឱ្យ ដួលរងរបួសធ្ងន់តែម្ដង។យ៉ាងណាក៏ដោយ អត្ដសញ្ញាណក្រុម ក្មេងស្ទាវទាំងនេះ មិនទាន់មានការបញ្ជាក់ នៅឡើយទេ ហើយអ្នកបើករថយន្ដមិនទាន់ ស្គាល់ឈ្មោះផងដែរ។ ក្រោយកើតហេតុ ម៉ូតូរបស់ជនរងគ្រោះ ត្រូវបានសមត្ថកិច្ចយកទៅរក្សាទុក ដើម្បី ចាត់ការបន្ដទៀត ៕
ផ្តល់សិទ្ធិដោយ៖ ដើមអំពិល