ភ្នំពេញ ៖ ក្មេងស្រីកំព្រា ឪពុកម្តាយម្នាក់ ត្រូវជនខិលខូចមិនស្គាល់អត្តសញ្ញាណចំនួន៤ នាក់ ចាប់រូបនាង ពីខេត្ត តាកែវ ដឹកឆ្ពោះមករាជធានីភ្នំពេញ ក្នុងបំណង យកនាងមកជួញដូរ ប៉ុន្តែសំណាងល្អ ត្រូវក្មេងស្រីរង គ្រោះដឹងខ្លួន រត់រួចពីកណ្តាប់ដៃក្រុមជនពាល កាលពីវេលាម៉ោង ៧ និង ២០ នាទីយប់ថ្ងៃទី២៤ ខែមករាឆ្នាំ ២០១៣ នៅចំណុច ផ្ទះគ្មាន ដំបូលមួយកន្លែងស្ថិតភូមិបាគូ ក្នុងសង្កាត់ដង្កោ ខណ្ឌដង្កោ រាជធានីភ្នំពេញ ។
ក្មេងស្រីរងគ្រោះខាងលើនេះមានឈ្មោះកែង ស្រីចិន អាយុ១៣ឆ្នាំ ជាសិស្សថ្នាក់ទី៧ នៃវិទ្យាល័យ ជា ស៊ីម តាកែវ មានស្រុកកំណើតនៅភូមិខ្នា សង្កាត់ដូនកែវ ក្រុង ដូនកែវ ខេត្តតាកែវ ។ ក្មេងស្រីរងគ្រោះ បាននិយាយរៀបរាប់ ប្រាប់សមត្ថកិច្ចថា មុនពេលមានការភ្ញាក់ផ្អើលនេះគឺរូបនាងបានជិះកង់ម្នាក់ឯង ចេញពីសាលារៀន ម៉ោង ជិតបួន ហើយជិះមិនទាន់បានឆ្ងាយ ពីសាលាប៉ុន្មានផង ស្រាប់តែមានជន សង្ស័យបួននាក់ បើករថយន្តសាំងយ៉ុង ពណ៌ ឈាមជ្រូក មួយគ្រឿង មកឈប់ក្បែរកង់នាង ហើយគំរាមនាងមិនឲ្យស្រែក ។ កុមារីរងគ្រោះបាន បន្តថាក្រោយមកជន សង្ស័យពីរនាក់ ចាប់ក្របួចនិងបិទមាត់នាង ឡើងមកលើរថយន្តបើកសំដៅ មកកាន់រាជធានីភ្នំពេញ ដោយបាន យកក្រណាត់បិទភ្នែកនាងថែមទៀតផង ។
ប្រភពដដែលបានបន្តថាខណៈបើកមកដល់រាជធានីភ្នំពេញជនសង្ស័យ បាននាំខ្លួនគេទៅផ្ទះ មួយកន្លែង ស្ថិតក្នុង ស្ថានភាពស្ងាត់ច្រងំតែម្តង ពេលនោះជនសង្ស័យទាំងបួននាក់ បានស្រាយចំណងចេញពីភ្នែក របស់នាង ហើយ ពួកគេបានឈរនិយាយគ្នា នៅខាងក្រៅផ្ទះ ពេលនោះរូបនាងដឹងខ្លួនឡើង មិនដឹងថា ខ្លួននៅកន្លែងណាឡើយ ក៏ស្រវេស្រវាផ្លោះចេញពីក្នុងផ្ទះ តាមបង្អួចមកក្រៅ រត់គេចខ្លួន មកដល់ផ្លូវលំ មួយកន្លែងបានជួប និងស្រ្តីម្នាក់ វ័យ ជាង៣០ឆ្នាំ កុមារីរងគ្រោះក៏ស្រែកឲ្យស្រ្តីរូបនោះ ជួយនាងផង ។ ដោយសារតែនាងស្រែកឆោឡោ បង្កឲ្យមាន ការ ភ្ញាក់ផ្អើល ដល់ប្រជាពលរដ្ឋ នៅកន្លែងកើតហេតុ ជនខិលខូចទាំងអស់នាំគ្នា រត់ទៅបើករថយន្តគេចខ្លួន បាត់អស់ តែម្តងទៅ។ ចំណែកកុមារីរងគ្រោះត្រូវបានប្រជាពលរដ្ឋនាំ ទៅដាក់បណ្តឹងនៅអធិការដ្ឋាន នគរបាលខណ្ឌដង្កោ ដើម្បីធ្វើការ ស្រាវជ្រាវតាមចាប់ខ្លួនជនសង្ស័យ ។
ពេលទទួលបានបណ្តឹងភ្លាមៗនោះ នគរបាលខណ្ឌដង្កោ បានចុះទៅពិនិត្យដល់ផ្ទះគ្មាន ដំបូលដែលក្រុម ជន សង្ស័យយកក្មេងស្រីមក ទម្លាក់នោះពុំឃើញមានស្លាក ស្នាម អ្វីគួរឲ្យកត់សម្គាល់ឡើយ ។ ជុំវិញករណីខាងលើ នគរបាលខណ្ឌដង្កោបានសន្និដ្ឋានថា ក្មេងស្រីនេះត្រូវក្រុមជន ខិលខូចចាប់យកមកលក់ នៅក្នុងរាជធានី ភ្នំពេញ ។ ប៉ុន្តែប្រជាពលរដ្ឋបានសន្និដ្ឋានថា ប្រហែលជារឿងគំនុំហើយ ព្រោះក្រុមជនសង្ស័យដឹកនាងពីខេត្តតាកែវយក មកទម្លាក់ចោលក្នុងព្រៃស្ងាត់ច្រងំបែបនេះ ។
ទាក់ទិននឹងហេតុការណ៍ ក្រោយពីធ្វើការសាកសួរ សមត្ថកិច្ចបានទំនាក់ទំនងទៅ មីងមារបស់កុមារីខាងលើនេះ ឲ្យមកទទួលយកទៅវិញហើយ ។ ចំពោះករណីនេះ លោក ប៉ុស ថុន អធិការរង នគរបាលខណ្ឌដង្កោបានឲ្យដឹងថា បន្ទាប់ពីធ្វើការសាកសួរទទួលបានចម្លើយពីក្មេងស្រីរងគ្រោះ សមត្ថកិច្ចសន្និដ្ឋានថា ក្រុមជនសង្ស័យ ចាប់ ខ្លួនក្មេង ស្រីអាយុ ១៣ ឆ្នាំនេះមកជួញដូរផ្លូវភេទនៅភ្នំពេញនេះតែម្តង ព្រោះខណៈដែលក្មេងរត់រួចនាង បានស្តាប់លឺសម្លេង ជនសង្ស័យ កំពុងនិយាយទូរស័ព្ទ តថ្លៃគ្នា រវាងតម្លៃខ្លួននាង៕
ផ្តល់សិទ្ធិដោយ៖ ដើមអំពិល