ខេត្តរតនគិរី ៖ ភ្នាក់ងារកាសែតវរជនខ្មែរម្នាក់ត្រូវបានឃាតករសម្លាក់ ចាក់សោទុកនៅក្នុងរថយន្តម៉ាកកាមរីស៊េរី៩៦ ពណ៌ស្លែ យកមកប្លុងចោលនៅក្នុងចំការស្វាយចន្ទី ត្រង់ចំណុចភូមិធួយអម្ពិលឃុំចាអ៊ុង ស្រុកអូរជុំ ហើយត្រូវបានប្រជាពលរដ្ឋប្រទះឃើញកាលពីវេលាម៉ោងជាង១២ថ្ងៃត្រង់ថ្ងៃទី១១ កញ្ញា ២០១២ ។
បុរសរងគ្រោះឈ្មោះហង្ស សេរីឧត្តម អាយុ៤៤ឆ្នាំ ជាភ្នាក់ងារកាសែតវរជនខ្មែរ មានទីលំនៅភូមិមួយ សង្កាត់ឡាបានសៀក ក្រុងបានឡុង ។ ប្រភពពីស្ត្រីជាប្រពន្ធឱ្យដឹងថា ប្តីរបស់គាត់បានបាត់តាំងពីថ្ងៃទី៩កញ្ញា ២០១២ មកម៉្លេះ ដោយពុំដឹងទៅណានោះទេ ។ ប្រភពបន្តថា មុនពេលបាត់ខ្លួនវេលាម៉ោង៧ យប់ថ្ងៃទី ៩ កញ្ញា មានគេហៅគាត់ឱ្យទៅជួបដោយទៅបាត់យូរពេកមិនឃើញមកវិញ គាត់ក៏បានទូរស័ព្ទទៅសួរតែទូរស័ព្ទចូលហើយគ្មានអ្នកទទួល លុះទូរស័ព្ទទៅម្តងទៀតមានអ្នកទទួលតែឮ សំឡេងគំរាមកំហែង រួចក៏បិទទូរស័ព្ទទៅ ។ ចាប់ពីពេលនោះមកគាត់ក៏ឱ្យបងប្អូនសាច់ញាតិជួយតាមរក តែរកពុំឃើញសោះ លុះមកដល់ថ្ងៃខាងលើ ស្រាបតែទទួលដំណឹងថា ប្តីបានស្លាប់ទៅហើយ ។ ទោះបីជាបែបណា សពបុរសរងគ្រោះពុំទាន់ដឹងថា ស្លាប់ដោយរបៀបណានោះទេ ដោយរង់ចាំមន្ត្រីជំនាញចុះមកពិនិត្យ ។
លើសពីនេះទៅទៀត របាយការណ៍ដដែល ក៏បានបន្ថែមអោយដឹងផងដែរថា ប៉ូលិសរកឃើញកន្លែងធ្វើឃាតបុរសអ្នកកាសែតវរៈជនប្រចាំនៅខេត្ត រតនគិរីហើយ បន្ទាប់ពីធ្វើការស្រាវជ្រាវអស់រយៈពេល៣ថ្ងៃរួចមក ដែលការរកឃើញកន្លែងធ្វើឃាតនេះ គឺដំបូងឡើយគេរកឃើញស្បែកជើងជនរងគ្រោះនៅក្នុងផ្ទះមួយដាច់ ស្រមាលពីគេបន្តិច កាលពីព្រឹកថ្ងៃទី ១៣ កញ្ញា ២០១២ បង្កឱ្យមានការភ្ញាក់ផ្អើលដល់សមត្ថកិច្ចចុះទៅពិនិត្យ និងសាកសួរ ដើម្បីស្វែងរកជនដៃដល់ ។
គួរបញ្ជាក់ផងដែរថា លោកហង្ស សេរីឧត្តម ជនជាតិខ្មែរ អាយុប្រហែល ៤៥ ឆ្នាំ ស្នាក់នៅភូមិ ១ សង្កាត់ឡាបានសៀក ក្រុងបានលុង ជាភ្នាក់ងារកាសែតវរៈជនខ្មែរ ត្រូវបានឃាតករសម្លាប់ញាត់ក្នុងគូទរថយន្តរបស់ខ្លួនម៉ាក កាមរីស៊េរី៩៦ ពណ៌ស្លែចាស់ចង្កូតឆ្វេង ពាក់ស្លាកលេខភ្នំពេញ2A-5905 ។ ក្រោយពិនិត្យរួចរាល់សមត្ថកិច្ចបានប្រគល់សពឱ្យសាច់ញាតិ ធ្វើបុណ្យតាមប្រពៃណី ។ ឯរថយន្តត្រូវសមត្ថកិច្ច រក្សាទុករង់ចាំធ្វើការស្រាវជ្រាវ បន្ត សមត្ថកិច្ចកំពុងសហការយ៉ាងសកម្មដើម្បីវែកមុខឃាតករផ្តន្ទា ទោសតាមច្បាប់ ។ មន្ត្រីសមត្ថកិច្ចនិយាយថា ការទូរស័ព្ទហៅយកទៅសម្លាប់នេះគឺទាក់ទងនឹងមនុស្សស្គាល់ គ្នាទើបហា៊នទៅទាំងយប់ដូចនេះការសម្លាប់គឺពិតជារឿងគំនុំ ហើយករណីនេះអាចឆាប់រកឃើញតាមរយៈលេខទូរស័ព្ទមិនខាន ៕
ដោយ ៖ រិទ្ធីប្រភព ៖ Kstp