បុរសម្នាក់នៅជប៉ុន បានចាក់សម្លាប់កូនប្រុសអាយុ ១២ឆ្នាំរបស់ខ្លួន ព្រោះតែក្មេងប្រុសនេះប្រឡងធ្លាក់ មិនអាចចូលរៀននៅសាលាឯកជនលំដាប់ខ្ពស់នៅក្នុងខែត្រ Aichi ។
Kengo Satake អាយុ ៤៨ឆ្នាំ បានសារភាពថា បានឈ្លោះប្រកែកគ្នាជាមួយកូនប្រុស ព្រោះតែកូនមិនខំសិក្សានៅមុនការប្រឡងចូលសាលាវិទ្យាល័យឯកជនមួយ នេះបើតាមសេចក្ដីរាយការណ៍របស់ NHK។ Kengo Satake តែងតែជេរស្ដីឱ្យកូន អំពីការសិក្សា។
នគរបាលទីក្រុង Nagoya ខែត្រ Aichi ឱ្យដឹងថា Ryota អាយុ ១២ឆ្នាំ ជាកូនប្រុសរបស់ Satake ត្រូវបានបញ្ជូនចូលមន្ទីរពេទ្យសង្គ្រោះបន្ទាន់ កាលពីថ្ងៃទី ២១សីហា បន្ទាប់ពីត្រូវឪពុកចាក់នឹងកាំបិត ប៉ុន្តែ ក្មេងប្រុសនេះបានស្លាប់ដោយសារតែបាត់បង់ឈាមច្រើន។
អ្នកនាំពាក្យរបស់នគរបាលថ្លែងថា “បុរសជាឪពុក បានប្រើកាំបិតក្នុងផ្ទះបាយ ចាក់ទៅលើដើមទ្រូងរបស់កូនប្រុស”។ Satake ត្រូវបានចាប់ខ្លួន បន្ទាប់ពីនគរបាល បានទទួលទូរស័ព្ទពីបុគ្គលិកពេទ្យ។
Satake សារភាពថា ខ្លួនបានសាក់ទៅលើកូន ព្រោះតែជ្រុលដៃ។ ម្ដាយរបស់ Ryota មិនមានវត្តមាននៅក្នុងផ្ទះនោះទេ ខណៈហេតុការណ៍កំពុងកើតឡើង។
សូមបញ្ជាក់ថា ការប្រឡងចូលរៀននៅសាលាឯកជនដែលល្អបំផុតនៅជប៉ុន ត្រូវបានធ្វើឡើងយ៉ាងតឹងតែង។ ការចូលរៀននៅសាលាល្បីៗ ត្រូវបានគេចាត់ទុកថាជាគន្លឹះសំខាន់ដែលអាចសម្រេចវាសនាអនាគតរបស់កុមារនៅជប៉ុន៕
ប្រែសម្រួល ៖ បុត្រា