ទីភ្នាក់ងារឧតុនិយមជប៉ុនដែលចេញការប្រកាសអាសន្នស៊ូណាមីរាយការណ៍ថា ការរញ្ជួយដីមួយមានកំលាំង៧,៤រីស្ទ័រ បានកើតមានកាលពីព្រឹកថ្ងៃទី២២ ធ្នូ ក្នុងដែនទឹកនៃប្រជុំកោះអូហ្គាសាវ៉ារ៉ា ក្នុងមហាសមុទ្រប៉ាស៊ីហ្វិក ។# ចំណុចកណ្តាលនៃការរញ្ជួយដីនេះដែលកើតមាននាវេលាម៉ោង២ និង២០នាទីរំលងអធ្រាត្រម៉ោងក្នុងស្រុកស្ថិតនៅជំរៅ១០គ.មក្រោមសមុទ្រ និងចំងាយ១០០០គ.ម ភាគខាងត្បូងក្រុងតូក្យូ ។ ការរញ្ជួយដីនេះបណ្តាលឱ្យមានស៊ូណាមី ដែលរលកសមុទ្រមានកំពស់៦០សង្ទីម៉ែត្រក្នុងដែនទឹកនៃកោះហាជី ចូ ស្ថិតនៅចំងាយប្រមាណ៣០០គ.មខាងត្បូងក្រុងតូក្យូ។ បន្ទាប់មកទីភ្នាក់ងារឧតុនិយមជប៉ុនបានបន្ថយការប្រកាសអាសន្នស៊ូណាមី ដោយគូសបញ្ជាក់ថា រលកសមុទ្រខ្ពស់បំផុតមានត្រឹមតែ៤៥សង្ទីម៉ែត្រប៉ុណ្ណោះ ។ មនុស្សប្រមាណជា១៧០នាក់ ត្រូវបានជំលៀសចេញពីមជ្ឈមណ្ឌលសាធារណៈ និងគ្រឹះស្ថានសិក្សាទាំងឡាយនៅលើកោះជីជី និងកោះហាហា។# ទីភ្នាក់ងារឧតុនិយមជប៉ុនបានសង្កត់ធ្ងន់លើប្រការដែលថា ការរញ្ជួយដីថ្ងៃទី២២ ធ្នូ នោះជាការរញ្ជួយដីខ្លាំងបំផុតមួយជាមួយចំណុចកណ្តាលមានជំរៅរាក់ ពុំធ្លាប់មានចាប់តាំងពីឆ្នាំ១៩៩៣មក ៕