យោងតាមទីភ្នាក់ងារព័ត៌មានកូរ៉េខាងត្បូង YONHAP ឱ្យដឹងថា រដ្ឋាភិបាល និងកងទ័ពកូរ៉េខាងត្បូង បច្ចុប្បន្នកំពុងតែពិនិត្យពីលទ្ធភាពនៃការផលិតយន្តហោះចម្បាំងចេះបំបាំងខ្លួនក្នុងក្រប ខណ្ឌនៃគំរោងផលិតយន្តហោះប្រដេញកូរ៉េខាងត្បូង KFX ។#ប្រភពយោធាកូរ៉េខាងត្បូងមួយឱ្យដឹងកាលពីថ្ងៃទី២៧ ធ្នូ ថា «ទស្សនាទាននៃយន្តហោះដែលកូរ៉េខាងត្បូងគ្រោងផលិតរវាងឆ្នាំ២០១៥ និង២០២០ តម្រង់ឆ្ពោះទៅរកយន្តហោះចេះបំបាំងខ្លួនមួយដែលអាចគេចផុតពីរាល់ប្រព័ន្ធរ៉ាដា។ គំរោងនៃការផលិតយន្តហោះធុននេះត្រូវពង្រឹងបន្ទាប់ពីការវាយប្រហាររបស់កូរ៉េខាងជើងមកលើ កោះ YEONPYEONG ។#ប្រភពនេះក៏ពន្យល់ផងដែរថា ការផលិតយន្តហោះចេះបំបាំងខ្លួននេះមានចែងក្នុងកម្មវិធីឱ្យទទួលបានមធ្យោបាយគួរឱ្យជឿ ជាក់ទាំងឡាយ ដើម្បីប្រឈមមុខជាមួយកូរ៉េខាងជើងដែលគំរាមកំហែងជាមួយបណ្តាមីស៊ីល និងអាវុធនុយក្លេអ៊ែររបស់ខ្លួន ។ ប្រភពនេះបន្តថា ជាមួយកំរិតបច្ចេកវិទ្យាបច្ចុប្បន្នខាងផ្នែកការពារយើងអាចបង្កើតបច្ចេកវិទ្យាសំរាប់ យន្តហោះចេះបំបាំងខ្លួនក្នុងបណ្តាឆ្នាំខាងមុខ ហើយផលិតយន្តហោះប្រភេទនេះ ។#អ្នកទទួលខុសត្រូវខាងយោធាកូរ៉េខាងត្បូងគូសបញ្ជាក់ថា យន្តហោះចេះបំបាំងខ្លួនអាចចូលរួមក្នុងបេសកកម្ម ដែលបង្កើតចន្លោះប្រហោងមួយ ចំពោះសមត្ថភាពការពារអាកាសរបស់កូរ៉េខាងជើង ដើម្បីកំណត់កន្លែងរសើបទាំងឡាយរបស់កូរ៉េខាងជើង ដូចជាអគារនានាដែលពួកមេដឹកនាំស្នាក់នៅ និងទីតាំងនុយក្លេអ៊ែរទាំងឡាយសំរាប់ការវាយប្រហារត្រូវចំគោលដៅ និងដើម្បីធ្វើឱ្យសត្រូវមានការខ្លបខ្លាច៕
