ព័ត៌មានអន្តរជាតិ ៖ យោងតាមការដកស្រង់អត្ថបទផ្សាយ ពីគេហទំព័រសារព័ត៌មានបរទេសស្កាយ កាលពីប៉ុន្មានម៉ោងមុននេះ បានគូសបញ្ជាក់អោយដឹងថា យ៉ាងហោចណាស់ មនុស្ស២១ នាក់បានស្លាប់បាត់បង់ជីវិតនៅក្រោមគំនរថ្មបាក់បែកនៃការដួលរលំសំណង់អាគារផ្សារទំនើបមួយកន្លែង មានទីតាំងស្ថិតនៅក្នុងក្រុង Riga ប្រទេស Latvia ។
លើសពីនេះ ប្រភពសារព័ត៌មានដដែលបន្ថែមថា ក្នុងចំណោមអ្នកដែលបានស្លាប់បាត់បង់ជីវិតទាំង ២១ នាក់នោះ ក្នុងនោះ រួមមាន មន្រ្តីពន្លត់អគ្គីភ័យ ៣ នាក់ផងដែរ ។ គួររំឭកដែរថាជាមួយនឹងសោកនាដកម្ម រលំបាក់សំណង់អាគារផ្សារទំនើប Maxima ស្ថិតនៅក្នុងក្រុងលើកនេះ បានកើតឡើងកាលពីវេលាល្ងាច ថ្ងៃព្រហស្បត្តិ៍ ម្សិលមិញនេះ។
បន្ថែមពីលើនេះ បើតាមការអោយដឹងពីប្រភពព័ត៌មាន ផ្តល់ដោយនាយកដ្ឋានសង្គ្រោះបន្ទាន់ គូសបញ្ជាក់អោយដឹងកាលពីថ្ងៃសុក្រ នេះថា យ៉ាងហោចណាស់មកទល់នឹងខណៈនេះ មនុស្ស ២១ នាក់ ត្រូវបានរកអោយឃើញថា បានស្លាប់បាត់បង់ជីវិតបាត់ទៅហើយដោយឡែក មិនទាន់ច្បាស់នៅឡើយនោះទេ ថាតើ មានមនុស្សប៉ុន្មាននាក់ជាប់គាំងនៅក្រោមគំនរថ្មបាក់រលំទាំងនេះ ស្របពេលដែលកិច្ចអន្តរាគមន៍ ក្នុងការសង្គ្រោះបន្ទាន់ ក្នុងការរុករកស្វែងរកអ្នករស់រានមានជិវិតនៅតែបន្តមាននៅឡើយ។
គួររំឭកផងដែរថា លោក Nils Usakovs ជាំអភិបាលក្រុងមួយនេះ បានអះអាងអោយដឹងថា នៅមានមនុស្ស ៧០ នាក់ទៀត ជាប់គាំងនៅក្នុងសំណង់អាគារមួយនេះ ដោយនៅក្នុងនោះ ៣៦ នាក់ត្រូវបានគេជួយសង្គ្រោះហើយ ។ គួរបញ្ជាក់ផងដែរថា ក្រុមជួយសង្គ្រោះដែលចេញបទអន្តរាគមន៍នោះ ក៏កំពុងតែមានភាពភ័យខ្លាច ក្នុងការបាក់រលំសំណង់អាគារនេះបន្ថែមទៀត ព្រោះថា មន្រ្តីពន្លត់អគ្គីភ័យ ៣ នាក់បានស្លាប់ ខណៈពេលដែលមានករណីរលំបាក់សំណង់អាគារ បន្ទាប់ពីមានករណីបាក់រលំដំបូលអាគារ កាលពីល្ងាចម្សិលមិញនេះជាមុនសិន។
យោងតាមសម្តីលោកRihards Kozlovskis រដ្ឋមន្រ្តីក្រសួងមហាផ្ទៃ បានផ្តល់ជាកិច្ចសម្ភាសន៍តាមរយៈទូរស័ព្ទ ទៅស្ថានីយ៍ទូរទស្សន៍ក្នុងស្រុកអោយដឹងថា ច្បាស់ណាស់ បញ្ហាអាចកើតឡើងទៅបាន គឺបណ្តាលមកពីកំហុសបច្ចេកទេសក្នុងការសាងសង់ តែទោះជាយ៉ាងណា ការលើកឡើងនេះ គ្រាន់តែជាការសន្និដ្ឋានជាជំហានដំបូងតែប៉ុណ្ណោះ យ៉ាងណាយ៉ាងណានោះ មូលហេតុក៏កំពុងតែស្ថិតនៅក្រោមការតាមដានស៊ើបអង្កេតនៅឡើយ៕
ប្រែសម្រួល ៖ កុសលប្រភព ៖ ស្កាយ