ប្រធានាធិបតីរុស្ស៊ី លោកឌីមីទ្រី ម៉េដវេដេវ បានអញ្ជើញទៅកាន់ទីក្រុងញូវដែល្លី រដ្ឋធានីរបស់ប្រទេសឥណ្ឌា កាលពីព្រឹកថ្ងៃទី២១ ធ្នូ សំរាប់ដំណើរទស្សនកិច្ចរយៈពេល២ថ្ងៃ ហើយដំណើរទស្សនកិច្ចនោះត្រូវបានគេមើលឃើញថា ជាឱកាសមួយនៃការស្វះស្វែងរកការចុះហត្ថលេខាលើកិច្ចព្រមព្រៀងនុយក្លេអ៊ែរ និងកិច្ចព្រមព្រៀងផ្នែកការពារជាមួយឥណ្ឌា ដែលជាដៃគូផ្នែកការទូត និងពាណិជ្ជកម្មជាប្រវត្តិសាស្ត្ររបស់រុស្ស៊ី ។#ដំណើរទស្សនកិច្ចរបស់លោកម៉េដវេដេវ ទៅកាន់ប្រទេសឥណ្ឌាធ្វើឡើងក្រោយពីដំណើរទស្សនកិច្ចនៅប្រទេសនេះ របស់មេដឹកនាំនៃប្រទេសអង់គ្លេស អាេមរិក បារាំង និងចិន ។#តាមប្រភពព័ត៌មានពីប្រទេសឥណ្ឌាថា ក្នុងអំឡុងពេលនៃដំណើរទស្សនកិច្ចរយៈពេល២ថ្ងៃនោះលោកប្រធានាធិបតីម៉េដវេដេវ ត្រូវបានគេរំពឹងថា នឹងចុះហត្ថលេខាលើកិច្ចព្រមព្រៀងផ្នែកនុយក្លេអ៊ែរ និងកិច្ចព្រមព្រៀងផ្នែកការពារមានតំលៃរាប់ពាន់លានដុល្លារជាមួយប្រទេសឥណ្ឌា។ ក្នុងកិច្ចព្រមព្រៀងនោះ ក៏នឹងរាប់បញ្ចូលផងដែរនូវការផ្គត់ផ្គង់ម៉ាស៊ីនរ៉េអាក់ទ័រ ផលិតថាមពលនុយក្លេអ៊ែររបស់រុស្ស៊ីទៅឱ្យឥណ្ឌា ។ #លោកម៉េដវេដេវ ថ្លែងថា ឥណ្ឌា និងរុស្ស៊ី មានទំនាក់ទំនងដែលមិនអាចកាត់ផ្តាច់បានជាមួយគ្នា៕
