លោកឌីយ៉ាហ្គោ ហ្វ័រណង់ដេស ឌីសេវ៉ាលឡូ ជាអ្នកនយោបាយលេចធ្លោមួយរូបរបស់ប្រទេសម៉ិចស៊ិក ដែលចាប់ពង្រត់កាលពីខែឧសភា កន្លងមក ត្រូវបានដោះលែងវិញហើយវិលត្រឡប់ទៅកាន់ភូមិគ្រឹះរបស់លោក ដោយសុវត្ថិភាព ក្រោយពីត្រូវចាប់ពង្រត់អស់រយៈពេល៧ខែ ។ លោកឌីយ៉ាហ្គោ ថ្លែងប្រាប់អ្នកកាសែតជាច្រើននាក់ ដែលប្រមូលផ្តុំគ្នានៅបរិវេណខាងក្រៅភូមិគ្រឹះរបស់លោក ក្នុងទីក្រុងម៉ិចស៊ីកូថា រូបលោកសុខសប្បាយជាទេ ហើយលោកអរគុណព្រះ ហើយចាប់ពីពេលនេះតទៅរូបលោកនឹងបន្តរស់នៅដូចធម្មតាទៀត ។ លោកបានបន្តថា ក្នុងនាមជាអ្នកមានជំនឿលើព្រះម្នាក់ រូបលោកសុខចិត្តអភ័យទោសដល់អ្នកចាប់ពង្រត់រូបលោក ។#លោកឌីយ៉ាហ្គោ ហ្វ័រណង់ដេស ជាអតីតព្រឹទ្ធសភា ហើយជាសម្ព័ន្ធមិត្តជិតស្និទ្ធរបស់ប្រធានាធិបតីម៉ិចស៊ិក លោក Felipe Calderon បានបាត់ខ្លួននៅថ្ងៃទី១៤ ឧសភា កន្លងមក នៅក្បែរកសិដ្ឋានចិញ្ចឹមសត្វរបស់លោកក្នុងរដ្ឋ Quere-taro ភាគកណ្តាលប្រទេសម៉ិចស៊ិក ។ ក្រោយមកលេចឮព័ត៌មានថា លោកត្រូវបានចាប់ពង្រត់ ។#លោកឌីយ៉េហ្គោ ក៏ជាអតីតបេក្ខជនសំរាប់តំណែងប្រធានាធិបតីក្នុងការបោះឆ្នោតជ្រើសរើសប្រធានាធិបតីរបស់ប្រទេ សម៉ិចស៊ិកកាលពីឆ្នាំ១៩៩៤ កន្លងមក សំរាប់គណបក្សនយោបាយមួយ ជាដៃគូរបស់គណបក្សដែលស្ថិតក្រោមការដឹកនាំរបស់លោក Felipe Calderon ជាហេតុធ្វើឱ្យមន្ត្រីនានាសន្និដ្ឋានថា លោកប្រហែលជាត្រូវចាប់ពង្រត់ដោយក្រុមអ្នករត់ពន្ធថ្នាំញៀនណាកូទិក ៕
