លេចធ្លាយ រូបភាពបុរសម្នាក់ រងរបួសយ៉ាងដំណំ ក្រោយមានជម្លោះរវាងក្រុម ម៉ូតូធំ និងរថយន្ត Range Rover

ព័ត៌មានអន្តរជាតិ ៖ ពិតណាស់ទាក់ទិននឹងព័ត៌មានមួយនេះ មិនត្រឹមតែសារព័ត៌មានកំសាន្តយើងខ្ញុំ ចាប់អារម្មណ៍ចុះផ្សាយជាបន្តបន្ទាប់នោះទេ តែនៅក្នុងនោះ បណ្តាគេហទំព័រសារព័ត៌មានពិភពលោកមួយចំនួនផ្សេងៗទៀត ក៏បានចាប់អារម្មណ៍ចុះផ្សាយដូចគ្នាផងដែរ ។ ជាមួយនឹងព័ត៌មានចុងក្រោយដែលក្រុមការងារយើងទទួលបាននោះគឺ រូបថតបុរសម្នាក់ ដែលរងគ្រោះក្នុងឧបទ្ទេវហេតុលើកនោះ ត្រូវបានចេញផ្សាយហើយ ពោលគឺ គាត់ទទួលរងរបួសយ៉ាងដំណំ ជើងទាំងសងខាង និងឆ្អឹងខ្នងរបស់គាត់ នេះបើយោងតាមការដកស្រង់អត្ថបទផ្សាយ ពីគេហទំព័រសារព័ត៌មានបរទេស ស្កាយ។

អាន ៖ - វីដេអូល្បីពេញអ៊ិនធើណេត ក្រុមម៉ូតូធំ ព្រួតវាយរថយន្តទំនើប Range Rover

- បុរសម្នាក់ ត្រូវបានចាប់ឃាត់ខ្លួន ក្រោយមានជម្លោះរវាងក្រុម ម៉ូតូធំ និងរថយន្ត Range Rover

យ៉ាងណាមិញ បើយោងតាមសម្តីគ្រួសារជនរងគ្រោះ បានផ្តល់ជាកិច្ចសម្ភាសន៍ដល់ក្រុមសារព័ត៌មានអោយដឹងថា បើយើងងាកក្រឡេកទៅមើលវីដេអូឃ្លីបវិញ មានពេលមួយនោះ លោកអ្នកពិតជាបានឃើញ នូវរថយន្តទំនើបនោះ បានបើកកិនអ្វីម៉្យាង តែវាមិនត្រឹមតែជាម៉ូតូតែប៉ុណ្ណោះទេ ពោលគឺ ក៏មានមនុស្សនៅពីក្រោមនោះផងដែរ។

គួររំឭកផងដែរថា ជម្លោះរហូតដល់ថ្នាក់ប្រើជាអំពើហឹង្សាមួយនេះ បានកើតឡើងកាលពីពេលកន្លងទៅ នៅឯសង្កាត់ Manhattan ក្រុងញ៉ួវយ៉ក សហរដ្ឋអាមេរិករវាងក្រុមម៉ូតូធំជាង៣០ គ្រឿង និងបុរសជាអ្នកបើករថយន្តទំនើប Range Rover ។ ផ្ទុយទៅវិញ បើយោងតាមសម្តីមន្រ្តីប៉ូលីសផ្លូវការប្រចាំតំបន់អោយដឹងថា បើនិយាយពីកំហុសគ្មាននរណាខុសឬត្រូវនោះទេ ពោលគឺ ខុសទាំងសង ខណៈក្រុមម៉ូតូធំ ត្រូវបានគេរាយការណ៍អោយដឹងថា បើករាងរញ៉េរញ៉ៃ រីឯ បុរសជាអ្នកបើករថយន្តទំនើប ក៏បានបើកទៅបុក គាត់ក៏មានកំហុសដែរពីព្រោះថា មិនព្រមឈប់ធ្វើការសម្របសម្រួលគ្នា តែបែរជាបើករត់គេច ដែលញ៉ាំងអោយអ្វីៗ ក្លាយជារឿងអាក្រក់លើសដើម ៕