ព័ត៌មានអន្តរជាតិ ៖ ទីភ្នាក់ងារសារព័ត៌មានបរទេស wkbn បានចេញផ្សាយ កាលពីថ្ងៃច័ន្ទម្សិលមិញនេះ អោយដឹងថា ជនរងគ្រោះទាំងពីររូប ដែលជាយុវតីស្រី វ័យ ១៦ ឆ្នាំ បានស្លាប់បាត់បង់ជីវិតនៅក្នុងឧបទ្ទេវហេតុ ធ្លាក់យន្តហោះ របស់អាកាសចរណ៍ Asiana នៅអាកាសយានដា្ឋនអន្តរជាតិ San Francisco រដ្ឋ កាលីហ្វរញ៉ា សហរដ្ឋអាមេរិក កាលពីថ្ងៃសៅរ៍កន្លងទៅនោះ ពួកគេទាំងពីរនាក់ គឺជាមិត្តល្អនឹងគ្នា ខណៈពេលដែលទាំងពីរនាក់ គឺជាសិស្សឆ្នើមផងដែរ។
នាង Wang Linjia គឺជាសិស្សឆ្នើមមួយរូប ដែលមានជំនាញខ្ពស់ខាង សរសរអក្សរផ្ចង់ និងរូបវិទ្យា ខណៈពេលដែល Ye Mengyuan គឺជាបេក្ខភាពទទួលជ័យលាភីខាងអត្តពលកម្មស្របពេលដែលមានជំនាញខ្ពស់ ខាងអក្សរសិល្ប៍ ។ គួររំឭកផងដែរថា ទាំងពីរនាក់ គឺជាយុវតីស្រី ដែលជាសិស្សសាលា ក្នុងចំណោចសិស្សសាលា ទាំង ២៩ នាក់ផ្សេងទៀតដែលត្រូវធ្វើដំណើរទៅកាន់សហរដ្ឋអាមេរិក ដោយមានការចូលរួមអមដំណើរ ដោយលោកគ្រូ៤ រូប មកពី Jiangshan ប្រទេសចិន គោលបំណងឆ្ពោះទៅកាន់ទីនោះ ដើម្បីចូលរួម sum-mer camp ។
គួររំឭកផងដែរថា សោកនាដកម្មធ្លាក់យន្តហោះ របស់ក្រុមហ៊ុនអាការចរណ៍ Asiana មួយនេះ បានកើតឡើងកាលពីថ្ងៃសៅរ៍កន្លងទៅ នៅឯអាកាសយានដា្ឋនអន្តរជាតិ San Fran-cisco រដ្ឋ កាលីហ្វរញ៉ា សហរដ្ឋអាមេរិក ដែលជាហេតុធ្វើអោយមនុស្ស ២ នាក់បានស្លាប់បាត់បង់ជីវិត ខណៈរាប់រយនាក់ផ្សេងទៀត បានទទួលរងរបួសធ្ងន់ និងស្រាល ៕