ព័ត៌មានអន្តរជាតិ ៖ ក្មេងស្រី វ័យ ៧ ឆ្នាំម្នាក់ ដែលមានឈ្មោះថា Nawaal Sayid បានស្លាប់បាត់បង់ជីវិតយ៉ាងអណោចអធម បន្ទាប់ពីបានធ្លាក់ពីរានហាល ជាន់ទី ១១ កំពស់ប្រមាណជាង ៣០ ម៉ែត្រ នេះបើតាមការដកស្រង់អត្ថបទផ្សាយ ពីគេហទំព័រសារព័ត៌មានបរទេសស្កាយ ដែលទើបតែបានចេញផ្សាយកាលពីប៉ុន្មានម៉ោងមុននេះ។
ប្រភពសារព័ត៌មានដដែលបន្ថែមថា ករណីឧបទ្ទេវហេតុ ដែលជាគ្រោះថ្នាក់ចៃដន្យខាងលើនេះ បានកើតឡើងកាលពីវេលាល្ងាចម៉ោងប្រមាណជាង ៦ និង ៣០ នាទីល្ងាច នៅភាគកណ្តាលទីក្រុងឡុងដ៍ ប្រទេសអង់គ្លេស។
យ៉ាងណាមិញ បន្ទាប់ពីទទួលបានទូរស័ព្ទជម្រាបអោយដឹង ពីព័ត៌មានគ្រោះថ្នាក់មួយនេះក្រុមការងារជួយសង្គ្រោះក៏ដូចជាឡានសង្គ្រោះបន្ទាន់ បានទៅដល់កន្លែងកើតហេតុភ្លាមៗតែជាអកុសល នាងតូចវ័យ ៧ ឆ្នាំនោះ បានស្លាប់បាត់បង់ជីវិតបាត់ទៅហើយ នៅឯមន្ទីរពេទ្យក្នុងស្រុកមួយកន្លែង បន្ទាប់ពីបានបញ្ជូនទៅដល់ទីនោះ ។
គួររំឭកផងដែរថា សារព័ត៌មានជឿថា មូលហេតុដែលបានបណ្តាលអោយក្មេងស្រីតូចវ័យ៧ ឆ្នាំរូបនេះ ធ្លាក់ពីរានហាល ជាន់ទី ១១ បានមែននោះ ទំនងមកពីការធ្វេសប្រហែសរបស់ម្តាយ ដែលទុកនាងចោលតែឯង រួចរត់ទៅបើកទ្វារផ្ទះ តែទោះជាយ៉ាងណា ក្រុមមន្រ្តីប៉ូលីស ក៏កំពុងតែធ្វើការតាមដានស៊ើបអង្កេត ដើម្បីរកមូលហេតុពិត ដែលបានបណ្តាល អោយកើតមានឡើងនូវសោកនាដកម្មខ្លោចចិត្តមួយនេះ៕
ដោយ ៖ ពិសីប្រភព ៖ ស្កាយ