ព័ត៌មានអន្តរជាតិ ៖ បើយោងតាមសេចក្តីរាយការណ៍ ដែលបានចេញផ្សាយដោយទំព័រសារព័ត៌មានបរទេស Happpening កាលពីវេលាល្ងាចម្សិលមិញនេះ បានបញ្ជាក់អោយដឹងថា ស្រ្តីជាម្តាយវ័យក្មេងម្នាក់ ប្រឈមនឹងការផ្តន្ទាទោសជាប់ទ្រុងដែក ខណៈលេចធ្លាយវីដេអូមួយស្តីអំពី ការបង្ខំកូនប្រុសតូចវ័យទើបតែ ២២ ខែអោយចេះជក់កញ្ឆា ។
គួរបញ្ជាក់ផងដែរថា ស្រ្តីជាម្តាយវ័យក្មេង វ័យ ២៤ ឆ្នាំ និងមានឈ្មោះថា Rachelle Braatenត្រូវបានចាប់ឃាត់ខ្លួន កាលពីសុក្រ សប្តាហ៍កន្លងទៅ នៅឯផ្ទះរបស់នាង ដែលមានទីលំនៅនារដ្ឋធានីវ៉ាស៊ីនតោន ខណៈពេលដែលក្មេងប្រុសតូចរូបនោះ ត្រូវបានបញ្ជូនទៅមជ្ឈមណ្ឌលគាំពារសុខភាព។
លើសពីនេះទៅទៀត ប្រភពសារព័ត៌មានដដែល បានបញ្ជាក់បន្ថែមអោយដឹងផងដែរថាឪពុកក្មេងប្រុសតូច ដែលត្រូវជាស្វាមីជនជាប់ចោទ ឈ្មោះ លោក Tyler J Lee វ័យ ២៥ ឆ្នាំក៏ត្រូវបានចាប់ឃាត់ខ្លួនជាបន្តបន្ទាប់ផងដែរ បន្ទាប់ពីក្រុមភ្នាក់ងារមានសមត្តកិច្ច បានរកឃើញនូវដើមកញ្ឆាដល់ទៅ ៤០ ដើម នៅក្នុងផ្ទះរបស់ពួកគេ៕
ដោយ ៖ រិទ្ធីប្រភព ៖ Happening