សឹង្ហបុរី ៖ ក្មេងប្រុសតូចវ័យ ៣ ឆ្នាំ បានស្លាប់បាត់បង់ជីវិត បន្ទាប់ពីបានលង់ទឹកសមុទ្រស្លាប់ នៅឯឆ្នេរសមុទ្រ Siloso ប្រទេសសឹង្ហបុរី កាលពីថ្ងៃអាទិត្យ ទី ១៦ មិ្សលមិញនេះ នេះបើយោងតាមអត្ថបទផ្សាយ ពីគេហទំព័រសារព័ត៌មានបរទេស អាស៊ីវ័ន ។
លើសពីនេះ បើយោងតាមប្រភពដដែលបន្ថែមថា ក្មេងប្រុសតូចវ័យ ៣ ឆ្នាំ ឈ្មោះ Haziq Anaqi Mohd Hafiz ត្រូវបានប្រកាស អោយដឹងថាបានស្លាប់នៅឯមន្ទីរពេទ្យ Singapore General Hospital កាលពីវេលាម៉ោងប្រមាណជាង ១ និង ១៤ នាទីរសៀល ។ ក្មេងប្រុសតូច ដែលជាជនរងគ្រោះរូបនេះ បានទៅលេងសមុទ្រជាមួយនឹងបងប្រុសវ័យ ៥ ឆ្នាំរបស់ខ្លួន រួមទាំងម្តាយទៅជាមួយផងដែរ។
ជាមួយគ្នានេះផងដែរ បើយោងតាមសម្តីលោក David Goh ដែលជានាយកចាត់ការទូទៅនៃរមណីយដ្ឋានមាត់សមុទ្រមួយនេះ បានអះអាងអោយដឹងថា ពួកគេក៏បានផ្តល់ជាជំនួយខ្លះៗដល់ក្រុមគ្រួសារជនរងគ្រោះ ខណៈពេលដែល កំពុងតែសហការជាមួយនឹងក្រុមមន្រ្តីប៉ូលីស ដើម្បីធ្វើការតាមដានស៊ើបអង្កេត ទៅលើករណីគ្រោះថ្នាក់មួយនេះ។
គួររំឭកផងដែរថា បន្ទាប់ពីបានរកឃើញថាក្មេងប្រុសតូចវ័យ ៣ ឆ្នាំនេះ បានលង់ទឹកស្លាប់នោះ គេបានបាត់ខ្លួនដល់ទៅ ១៥ នាទីឯណោះ បើទោះជាមានការខិតខំប្រឹងប្រែងស្វែងរកពីសំណាក់ឆ្មាំសមុទ្រយ៉ាងណាក៏ដោយ៕
ដោយ ៖ ពិសីប្រភព ៖ អាស៊ីវ័ន