ព័ត៌មានអន្តរជាតិ ៖ បើតាមការអោយដឹងពីគេហទំព័រសារព័ត៌មានបរទេស ស្កាយ ដែលទើបតែបានចេញផ្សាយកាលពីវេលាព្រឹកមិញនេះបានគូសបញ្ជាក់អោយដឹងថា បុរសម្នាក់ដែលជាពលរដ្ឋ រស់នៅរដ្ឋ តិចសាស់ សហរដ្ឋអាមេរិក ត្រូវបានរកឃើញថា បានស្លាប់បាត់បង់ជីវិតនៅនឹងកន្លែង បន្ទាប់ពីមានការវាយប្រហារពីសំណាក់ហ្វូងសត្វឃ្មុំ ដល់ទៅ ៤ ម៉ឺនក្បាល។
គួរបញ្ជាក់ផងដែរថា បុរសដែលបានស្លាប់បាត់បង់ជីវិតរូបនេះមានឈ្មោះ Larry Goodwinវ័យ ៦២ ឆ្នាំ។ ហើយបើនិយាយពីមូលហេតុ ដែលបានបណ្តាលអោយហ្វូងសត្វឃ្មុំដ៏ច្រើនទាំងនេះ បើកការវាយប្រហារទៅលើរូបគាត់នោះ ក៏ព្រោះតែគាត់បានបើកត្រាក់ទ័រ ទៅប៉ះនឹងគំនរឈើ ដែលជាសំបុកឃ្មុំទាំងនេះ។
លើសពីនេះ ប្រភពសារព័ត៌មានដដែល ក៏បានបញ្ជាក់បន្ថែមអោយដឹងផងដែរថា ពពួកសត្វឃ្មុំប្រភេទនេះ គឺជាពពួកសត្វឃ្មុំកំណាចបំផុត របស់អាហ្រ្វិក ដែលគេអោយឈ្មោះថា ឃ្មុំពិឃាត killer bees ។លោក Allen Miller ដែលជាម្ចាស់កសិដ្ឋានចិញ្ចឹមឃ្មុំកំណាចទាំងនេះ ក៏បានអះអាងផងដែរ ដោយសារតែវាសាហាវបែបនេះហើយ ទើបពេលខ្លះចង់អោយគាត់ដើរចេញពីមុខជំនួញមួយនេះ តែមកទល់នឹងពេលនេះសំបុកឃ្មុំ ដែលផ្ទុកទៅដោយឃ្មុំជាង ៤ ម៉ឺនក្បាលមួយនេះ ត្រូវបានបំផ្លាញចោលហើយ៕
ដោយ ៖ ពិសិដ្ឋប្រភព ៖ ស្កាយ