ព័ត៌មានអន្តរជាតិ ៖ ទីភ្នាក់ងារសារព័ត៌មានបរទេស usnews កាលពី ៩ ម៉ោងមុននេះ បានគូសបញ្ជាក់អោយដឹងថា ក្មេងស្រីតូច វ័យទើបតែ ១ ឆ្នាំ បានស្លាប់បាត់បង់ជីវិត កាលពីថ្ងៃព្រហស្បត្តិ៍ម្សិលមិញនេះ នៅឯរដ្ឋ Alabama ភាគអាគ្នេយ៍ សហរដ្ឋអាមេរិក បន្ទាប់ពីភ្លេចនិងបានទុកគេចោលនៅក្នុងឡាន ដល់ទៅរយៈពេលមួយម៉ោងពេញ ខណៈពេលដែលសីតុណ្ហភាព កើនឡើងដល់ទៅ ៣២ អង្សាឯណោះ។
នេះគ្រាន់តែជារូបភាព ក្រើនរំឭកតែប៉ុណ្ណោះ
យ៉ាងណាមិញ បើយោងតាមសម្តីមន្រ្តីប៉ូលីស អោយដឹងថា ក្រុមការងារពួកគាត់បានទទួលទូរស័ព្ទ កាលពីវេលាម៉ោង ១ និង ៣០ នាទីរសៀល ថាមានក្មេងតូចទុកចោលនិងជាប់នៅក្នុងឡានចតចោលមួយគ្រឿង។ បើយោងតាមសម្តីមន្រ្តីប៉ូលីសអោយដឹងថា ជាមួយនឹងសីតុណ្ហភាពកំពុងតែកើនកំដៅ ក្នុងរយៈពេលប៉ុន្មានថ្ងៃចុងក្រោយនេះ វាពិតជាមានការគំរាមគំហែងជាខ្លាំងនៅក្នុងការរស់នៅ តួយ៉ាង ដូចនៅក្នុងករណីនេះ វាអាចមានសមត្តភាពគ្រប់គ្រាន់ ក្នុងការឆក់យកអាយុជីវិត បើសិនណា មានការធ្វេសប្រហែសនោះ។
ប្រភពសារព័ត៌មានដដែលបន្ថែមថា ក្មេងស្រីតូចនោះ ត្រូវបានអះអាងថា បានស្លាប់បាត់បង់ជីវិត នៅឯមន្ទីរពេទ្យមួយកន្លែង ក្រោយពីបញ្ជូនគេទៅសង្គ្រោះមិនបានទាន់ពេលវេលា ។ គួររំឭកផងដែរថា មុននឹងបញ្ជូនកូនទៅកាន់មន្ទីរពេទ្យ មានពេលមួយនោះ គេឃើញស្រ្តីជាម្តាយ ស្ទុះមកធ្វើចលនាសង្គ្រោះបឋម(CPR) តែអ្វីៗបានយឹតពេលបាត់ទៅហើយ៕
ចងចាំ ៖ ការពារ ប្រសើរជាជាងព្យាបាល ដូច្នេះ ត្រូវប្រាកដអោយបានថា កូន តូចៗ មិនស្ថិតឆ្ងាយពីភ្នែកមាតាបិតានោះទេ ដូចករណីខាងលើនេះស្រាប់ គឺជា ឧទាហរណ៍ (បង្ការទុកមុន ជាជាងការស្តាយក្រោយ នាពេលបន្ទាប់) ៕
ដោយ ៖ ពិសីប្រភព ៖ usnews