រថយន្តក្រុងបោលចូលជ្រោះ សម្លាប់មនុស្សយ៉ាងហោច ១១ នាក់

ព័ត៌មានអន្តរជាតិ ៖ ​ បើតាមការអោយដឹងពីគេហទំព័រសារព័ត៌មានចិន  (Chinadaily)  ដែលបានចេញផ្សាយកាលពីម្សិលមិញនេះ បានអោយដឹងថា​ មនុស្ស ១១ នាក់បានស្លាប់បាត់បង់ជីវិតបន្ទាប់ពីរថយន្តក្រុងមួយគ្រឿង រអិលធ្លាក់ចូលក្នុងជ្រោះជ្រៅ។

គួរបញ្ជាក់ផងដែរថា   រឿងឧបទ្ទេវហេតុគ្រោះថ្នាក់ចរាចរណ៍មួយនេះ  បានកើតឡើង  នាម៉ោងប្រមាណជា  ៨  យប់នៅតាមបណ្តោយផ្លូវ  Longde  នាទីក្រុង Guyuan ប្រទេសចិន  ខណៈពេលរថយន្តក្រុងមួយគ្រឿង ដឹកអ្នកដំណើរ ១៧ នាក់  ចេញដំណើរពីតំបន់ Lanzhou  ទៅខេត្ត Gansu  ។

លុះមកដល់កន្លែងកើតហេតុ រថយន្តក្រុងមួយនោះ  បានរអិល នឹងក្រឡាប់ធ្លាក់ចូលទៅក្នុងជ្រោះជ្រៅដែលក្រោយមកបានបណ្តាលអោយមនុស្ស ១១ នាក់បានស្លាប់បាត់បង់ជីវិត ខណៈពេលអ្នករបួសធ្ងន់ផ្សេងទៀត  កំពុងសម្រាកព្យាបាលនៅក្នុងមន្ទីរពេទ្យ  ។  ដោយឡែក បើនិយាយពីមូលហេតុ   ដែលធ្វើអោយរថយន្តក្រុងមួយគ្រឿងនោះ  ធ្លាក់ចូលទៅក្នុងជ្រោះជ្រៅ  មិនទាន់បានដឹងច្បាស់នៅឡើយទេ ក៏ព្រោះតែស្តិតនៅក្រោមការតាមដានស៊ើបអង្កេតនៅឡើយ៕

ដោយ ៖ រិទ្ធីប្រភព ៖ Chinadaily