ព័ត៌មានអន្តរជាតិ ៖ បើយោងតាមសេចក្តីរាយការណ៍ ដែលបានចេញផ្សាយដោយទំព័រសារព័ត៌មានបរទេស កាលពីពេលកន្លងទៅនេះ បានបញ្ជាក់អោយដឹងថា លោក ស៊ី ជីនពីង កាលពីថ្ងៃទី១៥ វិច្ឆិកា បានឡើងបន្តវេនពីលោក ហ៊ូ ជីនតាវ ជាអគ្គលេខាបក្សកុំមុយនីស្កចិនហើយ ។ ក្នុងសុន្ទរកថាខ្លីមួយ ពេលលោកឡើងបង្ហាញខ្លួន នៅមុខសារព័ត៌មានរួមជាមួយមេដឹកនាំថ្មីជាច្រើនរូបទៀតនៅឯវិមានប្រជាជន លោក ស៊ី ជីនពីង មានប្រសាសន៍ថា ក្រុមមេដឹកនាំថ្មីត្រូវប្រឈមមុខនឹងការទទួលខុសត្រូវ ធំធេងទាំងឡាយ និងថាបក្សកុំមុយនីស្កចិនប្រឈមមុខនឹងការប្រឈមធ្ងន់ធ្ងរទាំងឡាយ ក្នុងនោះមានអំពើពុករលួយជាដើម ។ លោកបន្តថា ថ្នាក់ដឹកនាំថ្មីរបស់ចិនត្រូវធ្វើការខិតខំប្រឹងប្រែងដើម្បីធានាដល់ជីវភាពប្រសើរមួយសម្រាប់ប្រជាជន ។
គួរបញ្ជាក់ផងដែរថា លោក ស៊ី ជីនពីង ជាកូនប្រុសរបស់វីរបុរសបដិវត្តន៍ចិនមួយរូប រួចភរិយាលោកគឺ លោកស្រី ប៉េង លីយន់ ជាអ្នកចម្រៀងដ៏ល្បីល្បាញមួយរូប ហើយជាឧត្តមសេនីយ៍នៃកងទ័ពចិន ដែលមានប្រជាប្រិយភាពយ៉ាងខ្លាំងជាងស្វាមីផង ។ ប្តីប្រពន្ធមួយគូនេះមានកូនស្រីម្នាក់រៀននៅសហរដ្ឋអាមេរិក គឺនៅសាកលវិទ្យាល័យHARVARD។ លោកស៊ីដំបូងជាមេដឹកនាំខេត្តមួយរូប បន្ទាប់មកជាមេដឹកនាំ ក្រុងសៀងហៃ មុនពេលចូលក្នុងបក្សកុំមុយនីស្កចិន ក្នុងឆ្នាំ ២០០៧ ហើយលោកក្លាយជាអនុប្រធានាធិបតីចិនកាលពីឆ្នាំ២០០៨ ។
របាយការណ៍ដដែលបានបន្ថែមអោយដឹងថា លោក ស៊ី ជាទូទៅគេចាត់ទុកថាជាមនុស្សមានការសម្របសម្រួលដែលអាចទទួលយកបាន ទាំងដោយបណ្តាក្រុមអ្នកកែទម្រង់និយមទាំងដោយពួកអ្នកអភិរក្សនិយម ។ មនុស្សបន្ទាប់ពីលោកនឹងជាលោក លី កឺក្វាង ដែលជាអ្នកនឹងឡើងជំនួសលោក វេន ជាបាវ ជានាយករដ្ឋមន្ត្រីនាខែមីនាខាងមុខនេះ ៕
ដោយ ៖ រិទ្ធីប្រភព ៖ ft