ព័ត៌មានអន្តរជាតិ ៖ បើយោងតាមរបាយការណ៍ដែលបានចេញផ្សាយដោយគេហទំព័រវិទ្យុអូស្រ្តាលី បានបញ្ជាក់អោយដឹងថា ព្រះអង្គម្ចាស់ William និងអ្នកម្នាង Catherine នៃប្រទេសអង់គ្លេសបានយាង នឹង ធ្វើដំណើរទៅដល់ប្រទេសសិង្ហបុរីហើយ ដែលជាចំណុចចាប់ផ្ដើមនៃរាជដំណើរទស្សនកិច្ចរយៈពេល ៩ ថ្ងៃ នៅតំបន់អាស៊ីអាគ្នេយ៍ និងប៉ាស៊ីហ្វិក ក្នុងការអបអរខួបនៃការឡើងគ្រងរាជ្យនៃម្ចាស់ក្សត្រិយ៍នៃចក្រភពអង់គ្លេស។
គួរបញ្ជាក់ផងដែរថា ដំណើរទស្សនកិច្ចនេះក៏នឹងបន្តទៅកាន់ប្រទេសម៉ាឡេស៊ី , ប្រទេសដែនកោះ Solomon និង ប្រទេសដែនកោះ Tuvalu នៅសមុទ្រប៉ាស៊ីហ្វិក ហើយនឹងមាននូវសុន្ទរកថា ក្រៅប្រទេសជាលើកដំបូងរបស់អ្នកម្នាង Kate Middleton ផងដែរ។
នៅឯសួនផ្កាដ៏ធំល្បីល្បាញរបស់ក្រុងសិង្ហបុរី ហៅថា Singapore's Botanic Gardens មានការប្រសិទ្ធនាម ផ្កាអូ័រគីដេមួយប្រភេទជាឈ្មោះនៃគូសាមីមួយគូនេះ ។ លើសពីនេះទៅទៀត របាយការណ៍ដដែលបានបន្ថែមអោយដឹងផងដែរថា គូស្វាមីវ័យក្មេងនៃរាជវង្សអង់គ្លេសនេះធ្វើដំណើរទស្សនកិច្ចឆ្នាំនេះជា ផ្នែកមួយនៃការចូលរួមអបអរសាទរការឡើងគ្រងរាជ្យខួប ៦០ ឆ្នាំ នៃព្រះមហាក្សត្រិយានីElizabeth ទី២ ដែលត្រូវជាព្រះអយ្យិការបស់ព្រះអង្គម្ចាស់ William៕
ដោយ ៖ ពិសីប្រភព ៖ radioaustralia