ការព្រួយបារម្ភពីសុវត្ថិភាពរបស់ក្មេងស្រីវ័យ 12 ឆ្នាំម្នាក់នៅតែបន្តមាន ស្របពេលដែលក្រុមមន្រ្តីប៉ូលីស បានបន្តការស្វែងរក ក្រោយពីគេបានបាត់ខ្លួនជាងមួយសប្តាហ៍រួចមកហើយ ។
បើតាមរបាយការណ៍បានបញ្ជាក់អោយដឹង ក្មេងស្រីវ័យ 12 ឆ្នាំ រូបនេះ មានឈ្មោះថា Tia Sharp បានបាត់ខ្លួនកាលពីថ្ងៃសុក្រសប្តាហ៍មុន បន្ទាប់ពីនាងបានទៅលេងផ្ទះជីដូនរបស់នាង នៅឯភាគខាងត្បូងនៃទីក្រុងឡុងដ៍ លុះក្រោយមកប៉ូលីស ក៏បានធ្វើកិច្ចសម្ភាសន៍ ជាមួយនឹងលោក Stuart Hazell វ័យ 37 ឆ្នាំដែលជាមិត្តប្រុសរបស់ជីដូនក្មេងស្រីម្នាក់នោះ ស្របពេលដែលគេជាសក្សីក៏ដូចជាបុគ្គលចុងក្រោយគេបង្អស់ដែលបានជួបក្មេងស្រីវ័យ 12 ឆ្នាំ រូបនោះ មុនពេលបានបាត់ខ្លួន ។
លើសពីនេះទៅទៀត បើតាមប្រភពព័ត៌មាន ក៏ដូចជាសាក្សីបានអោយដឹងថា ពួកគេបានឃើញក្មេងស្រីរូបនេះដើរចេញពីផ្ទះជីដូនដែលមានឈ្មោះ Christine Sharp នឹងមានវ័យ 46 ឆ្នាំ កាលពីសប្តាហ៍មុនពោលគឺ អំឡុងពេលរសៀល ថ្ងៃសុក្រ ដែលក្រោយមកពួកគេមិនបានដឹងច្បាស់ថា ក្មេងស្រីវ័យ 12 ឆ្នាំរូបនោះទៅទីណានោះទេ។
គួរបញ្ជាក់ផងដែរថា ក៏មានការតាមដានស៊ើបអង្កេត យ៉ាងស្វិតស្វាញទាក់ទិននឹងការបាត់ខ្លួនក្មេងស្រីវ័យ12ឆ្នាំរូបនេះ ពីសំណាក់ក្រុមភា្នក់ងារប៉ូលីសផងដែរ តែគ្មានមុខសញ្ញា ក៏ដូចជាតំរុយណាមួយ ដែលចង្អុលបង្ហាញផ្លូវនោះទេ រហូតមកទល់នឹងពេលនេះ ក៏នៅតែបន្តតាមដានស៊ើបអង្កេតដដែល ស្របពេលដែល Posters រាប់រយត្រូវបានបិទប្រកាស គ្រប់ទីកន្លែងក្នុងទីក្រុង ជាសារមួយក្នុងការស្វែងរកក្មេងស្រីរូបនោះផងដែរ៕
ដោយ ៖ ពិសិដ្ឋប្រភព ៖ news.sky