ព័ត៌មានអន្តរជាតិ ៖ យ៉ាងហោចណាស់ មនុស្ស ១០ នាក់ បានស្លាប់បាត់បង់ជីវិត បន្ទាប់ពីភ្លៀងមួយមេធំ បានធ្លាក់ជោគជាំ និងបង្កើតបានជាគ្រោះទឹកជំនន់ នៅឯភាគកណ្តាលអ៊ឺរ៉ុបនេះបើតាមការអោយដឹងពីគេហទំព័រសារព័ត៌មានបរទេស ស្កាយ ។
គួរបញ្ជាក់ផងដែរថា ទឹកជំនន់ដែលបានជន់លិច ភាគកណ្តាលអ៊ឺរ៉ុប លើកនេះ គឺមានផលប៉ះពាល់ ក៏ដូចជាជន់លិច ប្រទេស អាល្លីម៉ង់ ប៉ូឡូញ អូទ្រីស និង សាធារណរដ្ឋឆេក ។យ៉ាងណាមិញ បើនិយាយពីជនរងគ្រោះ ដែលបានស្លាប់បាត់បង់ជីវិតទាំង ១០ នាក់លើកនេះ ៥ នាក់ ជាពលរដ្ឋសាធារណរដ្ឋឆេក និង ៥ នាក់ផ្សេងទៀត មកពី អាល្លីម៉ង់ ប៉ូឡូញនិង អូទ្រីស។
ប្រភពសារព័ត៌មានដដែល បន្ថែមអោយដឹងផងដែរថា រដ្ឋាភិបាលប្រទេសនីមួយៗ ក៏កំពុងចេញយុទ្ធនាការជូយសង្គ្រោះរបស់ខ្លួន ដោយធ្វើការជម្លៀសពលរដ្ឋរាប់ពាន់នាក់ទៅកាន់ទីខ្ពស់ មានសុខសុវត្ថិភាព ខណៈលំនៅស្ថានរបស់ពួកគេមួយចំនួន ត្រូវបានរងការខូចខាត និងជន់លិច ក៏ព្រោះស្ថិតនៅទីទួលទាប។
ដោយឡែក នាយករដ្ឋមន្រ្តី សាធារណរដ្ឋឆេក លោក Petr Necas បានចេញសេចក្តីថ្លែងការណ៍ជាបន្ទាន់ កាលពីថ្ងៃអាទិត្យ អោយមានការចុះជួយអន្តរាគមន៍ជាបន្ទាន់ តាមដែលអាចធ្វើទៅបាន៕
ដោយ ៖ ពិសិដ្ឋប្រភព ៖ ស្កាយ