ព័ត៌មានអន្តរជាតិ ៖ បើយោងតាមការដកស្រង់ព័ត៌មាន ដែលបានចេញផ្សាយដោយគេហទំព័របរទេស អាស៊ីវ័ន កាលពីពេលថ្មីៗនេះ បានបញ្ជាក់អោយដឹងថា បុរសជនជាតិម៉ាឡេស៊ីម្នាក់ត្រូវបានចាប់ឃាត់ខ្លួន ខណៈពេលតាំងបង្ហាញលក់នូវរថយន្តទំនើបជាច្រើនធ្វើព្រងើយ ដែលនៅក្នុងនោះ រថយន្តទំនើប ៥ គ្រឿង មានតម្លៃជាង ១,៤ លានដុល្លារ ជាឡានលួចគេទៅវិញ។
គួរបញ្ជាក់ផងដែរថា ក្រុមមន្ត្រីប៉ូលីស នៅតែបន្តការតាមដានស៊ើបអង្កេតនៅឡើយ ថាតើឡានទំនើបផ្សេងៗទៀតជារបស់លួចគេឬក៏យ៉ាងណា?ដោយឡែក បើយោងតាមប្រភពសារព័ត៌មានដដែលនេះ បានបន្ថែមថា ករណីខាងលើនេះ បានកើតឡើងនៅឯក្រុង Selangorប្រទេសម៉ាឡេស៊ី។
យ៉ាងណាមិញ បើយោងតាមសម្តីមន្រ្តីនគរបាល ប្រចាំក្រុង Selangor លោក Comm Datuk Tun Hisan Tun Hamzah បានបញ្ជាក់បន្ថែមអោយដឹងផងដែរថា បុរសដែលជាជនជាប់ចោទរូបនោះ អាចលក់ចេញនូវរថយន្តទំនើបៗ បន្ទាប់ពីលួចបាននោះ តាមរយៈការផ្តល់ទំនុកទុកចិត្តដល់អតិថិជនរបស់ខ្លួន ពោលគឺ លក់ចេញនៅក្នុងតម្លៃទាប ជាមួយនឹងពន្ធផ្លូវ ក៏ដូចជា ធានារ៉ាប់រង ក្លែងក្លាយ ដែលអតិថិជនខ្លួនឯងនោះ មិនបានដឹងទាល់តែសោះ៕
ដោយ ៖ រិទ្ធីប្រភព ៖ អាស៊ីវ័ន