គ្រោះថ្នាក់ ៖ បើតាមការអោយដឹងពីរបាយការណ៍ ដែលបានផ្តល់ដោយសារព័ត៌មានបរទេសបានបញ្ជាក់អោយដឹងថា ការតាមដានស៊ើបអង្កេតរបស់ក្រុមភ្នាក់ងារមានសមត្តកិច្ចនៅតែបន្តនៅឡើយ បន្ទាប់ពីម្ចាស់កសិដ្ឋាន ត្រូវបានសន្មត់ជាជំហានដំបូងថាត្រូវបានជ្រូករបស់ខ្លួនស៊ីជាចំណី។
គួររំឮកផងដែរថា បើយោងតាមសម្តី របស់ក្រុមគ្រួសារម្ចាស់កសិដ្ឋាន បានបញ្ជាក់អោយដឹងថា លោកតា Terry Garner វ័យ ៧០ ឆ្នាំ គឺជាម្ចាស់កសិដ្ឋានមួយកន្លែង នារដ្ឋ Oregon សហរដ្ឋអាមេរិក ហើយត្រូវបានរកអោយឃើញថា គាត់មិនវិលត្រលប់មកផ្ទះវិញដូចរាល់ដងនោះទេ បន្ទាប់ពីគាត់បានទៅដាក់ចំណីអោយជ្រូកនៅឯកសិដ្ឋាន។
ទន្ទឹមនឹងការតាមដានស៊ើបអង្កេតជាជំហានដំបូងនេះ បានរកឃើញបំណែកធ្មេញមួយចំនួនរបស់គាត់ នៅក្បែរៗ នឹងរបងការពារជ្រូកកុំអោយចេញមកក្រៅ ខណៈពេលដែលភ្នាក់ងារមានសមត្តកិច្ចបានអះអាងថា គាត់ត្រូវបានរកអោយឃើញថា មានជម្ងឺគាំងបេះដូង ហើយស្របពេលដែលទៅផ្តល់ចំណីនោះ ទំនងជាជម្ងឺរបស់គាត់រើឡើង ហើយឆ្លៀតនៅក្នុងឧកាសនោះ ជ្រូកឃោរឃៅដែលមួយក្បាលៗ មានទម្ងន់ពី ៣១៨ គីឡូក្រាមឡើងទៅ អាចនឹងស៊ីគាត់ជាចំណីក៏ថាបាន។
ដោយឡែក នេះគ្រាន់តែជាការតាមដានស៊ើបអង្កេតជំហានដំបូងតែប៉ុណ្ណោះ ស្របពេលករណីដ៏ក្តៅគគុកមួយនេះ នឹងតែបន្តតាមដាននៅឡើយ៕
ដោយ ៖ រិទ្ធីប្រភព ៖ nydailynews/dailymail/Spy