ព័ត៌មានអន្តរជាតិ ៖ ដោយសីតុណ្ហភាពចេះតែកើនកំដៅ បាឡុងហោះ ដែលផ្ទុកមនុស្សដល់ទៅ ១១ នាក់ បានផ្ទុះ និងធ្លាក់ចូលទៅបឹងមួយកន្លែង ក្នុងប្រទេស ហូឡង់ នេះបើតាមការដកស្រង់អត្ថបទផ្សាយ ពីគេហទំព័រសារព័ត៌មានបរទេស ស្កាយ ដែលទើបតែបានចេញផ្សាយកាលពីកន្លងទៅនេះ។
ជាសំណាងល្អ ក្រុមមនុស្សទាំង ១១ នាក់នោះ មិនបានស្លាប់បាត់បង់ជីវិតអ្វីនោះទេ ក្រោយពីជួបឧបទ្ទេវហេតុមួយនេះ ពោលគឺ ទទួលរងរបួសតែ ២ នាក់តែប៉ុណ្ណោះ ។ គួររំឭកផងដែរថា ករណីគ្រោះថ្នាក់ផ្ទុះធា្លក់បាឡុងហោះមួយនេះ បានកើតឡើងនៅឯបឹង Gooi ក្រុង Alme-re ប្រទេស ហូឡង់ ។
ភ្លាមៗនោះ កាលដែលបានដឹងឮ ថាបាឡុងហោះ ជួបនឹងឧបទ្ទេវហេតុផ្ទុះធ្លាក់ហើយនោះក្រុមមន្រ្តីជួយសង្រ្គោះដែលនៅក្នុងនោះរួមមាន ៖ ភ្នាក់ងារខាងពន្លត់អគ្គីភ័យ មន្រ្តីប៉ូលីសឆ្មាំសមុទ្រ ក៏ដូចជារថយន្តសង្គ្រោះបន្ទាន់ ក៏បានចុះអន្តរាគមន៍ ទៅដល់កន្លែងកើតហេតុមួយរំពេច ខណៈពេល ដែលមួយសន្ទុះក្រោយមក មនុស្សពីរនាក់ ត្រូវបានបញ្ជូនទៅកាន់មន្ទីរពេទ្យ ដើម្បីធ្វើការជួយសង្គ្រោះ។
គួរបញ្ជាក់ផងដែរថា ករណីខាងលើនេះ បានកើតឡើងកាលពីថ្ងៃអង្គារកន្លងទៅនេះ ស្របពេលដែលមូលហេតុ ដែលនាំអោយមានការផ្ទុះធ្លាក់ ក៏កំពុងតែស្ថិតនៅក្រោមការតាមដានស៊ើបអង្កេតនៅឡើយ តែបើតាមការអះអាងជាជំហានដំបង ថាបណ្តាលមកពីអាកាសធាតុក្តៅពេក៕
ដោយ ៖ ពិសិដ្ឋប្រភព ៖ ស្កាយ