ព័ត៌មានអន្តរជាតិ ៖ បើតាមការអោយដឹងពីគេហទំព័រសារព័ត៌មានបរទេស Sky បានបញ្ជាក់អោយដឹងថា មានឧបទ្ទេវហេតុគ្រោះថ្នាក់ចរាចរណ៍មួយបានកើតឡើង ទៅលើមន្រ្តីប៉ូលីសមា្នក់ដែលជាអ្នកអន្តរាគមន៍ ពោលគឺ ធ្វើការបិទផ្លូវ ដើម្បីសំរួលដល់ក្បួនដង្ហែររថយន្ត ក្នុងការឃោសនាដោយធ្វើការគាំទ្រ ទៅលើលោកប្រធានាធិបតី Barack Obama ។
គួរបញ្ជាក់ផងដែរថា រឿងឧបទ្ទេវហេតុគ្រោះថ្នាក់ចរាចរណ៍មួយនេះ បានកើតឡើង នៅឯរដ្ឋ Florida សហរដ្ឋអាមេរិក ខណៈពេលដែលមន្រ្តីចរាចរណ៍ម្នាក់នោះ កំពុងតែធ្វើការបិទផ្លូវសម្រាប់ក្បួនដង្ហែររថយន្ថឃោសនា ភ្លាមៗនោះ ស្រាប់តែមានរថយន្ត Ford F-150 បានបោលយ៉ាងកម្រោលមកបុកគាត់តែម្តង នេះបើយោងតាមសម្តីលោកស្រី Teri Barbera ដែលជាមន្រ្តីផ្លូវការប្រចាំតំបន់នោះ។
លើសពីនេះទៅទៀត របាយការណ៍ដដែលក៏បានបញ្ជាក់បន្ថែមថា ភ្លាមៗនោះ ជនរងគ្រោះត្រូវបានបញ្ជូនទៅកាន់មន្ទីរពេទ្យ ដើម្បីធ្វើការសង្គ្រោះបន្ទាន់ តែជាអកុសល គាត់បានស្លាប់បាត់បង់ជីវិតទៅហើយ ដោយឡែក បើនិយាយពីអត្តសញ្ញាណបុរសជនរងគ្រោះនោះវិញ មកទល់នឹងពេលនេះ មិនទាន់មានការបញ្ជាក់អោយដឹងនោះទេ ស្របពេលដែលរឿងឧបទ្ទេវហេតុមួយនេះ កំពុងតែស្តិតនៅក្រោមការតាមដានស៊ើបអង្កេតនៅឡើយ៕
ដោយ ៖រិទ្ធីប្រភព ៖ Sky