ព័ត៌មានអន្តរជាតិ ៖ យ៉ាងហោចណាស់ មនុស្ស ១៣ នាក់បានស្លាប់បាត់បង់ជីវិត ខណៈ៣២ នាក់ផ្សេងទៀត បានទទួលរងរបួសធ្ងន់ និង ស្រាល បន្ទាប់ពីរថយន្តក្រុងផ្ទុកអ្នកដំណើរ៤៦ នាក់មួយគ្រឿង បានបើកធ្លាក់ស្ពាន និងបោលចូលជ្រោះជ្រៅ នេះបើយោងតាមការដកស្រង់អត្ថបទផ្សាយ ពីគេហទំព័រសារព័ត៌មានបរទេស ស្កាយ ដែលទើបតែបានចេញផ្សាយកាលពីប៉ុន្មានម៉ោងមុននេះ។
លើសពីនេះ ប្រភពសារព័ត៌មានដដែលបញ្ជាក់ថា ករណីខាងលើនេះបានកើតឡើងនៅតំបន់ជ្រោះជ្រៅ gorge ប្រទេស Montenegro ។ យ៉ាងណាមិញ បើយោងតាមការដកស្រង់សម្តីមន្រ្តីផ្លូវការ មកពីក្រសួងមហាផ្ទៃ លោក Rasko Konjevic អោយដឹងថា ៖ នៅក្នុងឧបទ្ទេវហេតុ រថយន្តក្រុងបើករអិលធ្លាក់ពីលើស្ពាន ដ៏គួរអោយរន្ធត់មួយនេះ បានបណ្តាលអោយមនុស្ស ១៣ នាក់ស្លាប់បាត់បង់ជីវិត ខណៈ ៣២ នាក់ផ្សេងទៀត បានទទួលរងរបួសក្នុងនោះ ៧ នាក់ រងរបួសធ្ងន់ ដែលមានការគំរាមគំហែងដល់អាយុជីវិតរាល់អ្នករងរបួសទាំងអស់ កំពុងសម្រាកព្យាបាល នៅក្នុងមន្ទីរពេទ្យ Podgorica ស្ថិតនៅក្នុងក្រុងធំ ជាងគេរបស់ប្រទេសនេះ។
គួររំឭកផងដែរថា កន្លែងដែលបានកើតឡើងនូវគ្រោះថ្នាក់មួយនេះ ប្រភពបញ្ជាក់ថា ជាញឹកញាប់ តែងកើតមានឡើងនូវគ្រោះថ្នាក់ចរាចរណ៍ ក៏ព្រោះតែរថយន្តទាំងនោះ បើកក្នុងល្បឿនលឿន ស្របពេលដែលតំបន់នេះ សំបូរទៅដោយផ្លូវកោង ៕
ដោយ ៖ ពិសិដ្ឋប្រភព ៖ ស្កាយ