ព័ត៌មានអន្តរជាតិ ៖ បើតាមការអោយដឹងពីទំព័រសារព័ត៌មានបរទេស Happening ដែលទើបតែបានចេញផ្សាយកាលពីពេលកន្លងទៅនេះ បានបញ្ជាក់អោយដឹងថា នៅយប់ថ្ងៃទី១៨ មករា និស្សិតស្រីដែលមានឈ្មោះថា Li Mei Feng វ័យ ២២ ឆ្នាំ មកពីខេត្ត Sichuan ប្រទេសចិនបានធ្វើដំណើរជាមួយនឹងប្អូនស្រីខ្លួន ដើម្បីទៅសួរសុខទុក្ខឪពុកម្តាយ ។ ដោយមានការនឿយហត់ពេញមួយថ្ងៃជាមួយនឹងការសិក្សា ក៏ដូចជាការធ្វើដំណើរ ក៏បានធ្វើអោយភ្នែករបស់នាងមានអារម្មណ៍មិនសូវស្រួល រំពេចនោះ នាងក៏បានទាញយកកូនដបតូចមួយនៅក្នុងកាបូប មកបន្តក់ភ្នែក តែភ្លាមៗនោះ ភ្នែករបស់នាងក៏បានចាប់ផ្តើមឈឺមួយរំពេច ដូច្នេះទើបនាងដឹងថា ដបតូចដែលនាងយកមកបន្តក់នោះ មិនមានជាថ្នាំបន្តក់ភ្នែកនោះទេ តាមពិតទៅវាគឺជា ជ័រកាវបិទក្រចកដៃទៅវិញ (super-adhesive nail glue) ។
ភ្លាមៗនោះ ក៏មានការអន្តរាគមន៍ ដោយបានបញ្ជូននាងទៅកាន់មន្ទីរពេទ្យ ដើម្បីធ្វើការសង្គ្រោះបន្ទាន់ ខណៈពេលដែលភ្នែករបស់នាងមានការឈឺចាប់ជាខ្លាំង និងមិនអាចបើកបានថែមទៀតផង។ បន្ទាប់ពីមានការខិតខំប្រឹងប្រែងជួយសង្គ្រោះពីក្រុមវេជ្ជបណ្ឌិត ជាលទ្ធផលភ្នែករបស់នាងក៏បានធូរស្រាលមកវិញជាធម្មតា។
លើសពីនេះទៅទៀត បើយោងតាមសម្តីជនរងគ្រោះបានបញ្ជាក់ថា រាល់សព្វមួយដង ដបបន្តក់ភ្នែក និងដបកាវបិទក្រចកនាងដាក់នៅកន្លែងផ្សេងគ្នា នៅក្នុងកាបូបនោះ តែចៃដន្យអីនៅថ្ងៃកើតហេតុនាងបែរជាច្រឡំដាក់ពួកវានៅជាមួយគ្នាទៅវិញ ក៏បណ្តាលអោយមានឧបទេ្ទវហេតុនេះកើតឡើងតែម្តង៕
ដោយ ៖ ពិសីប្រភព ៖ Happening