ព័ត៌មានអន្តរជាតិ ៖ បាតុកររាប់ពាន់នាក់បានមកប្រមូលផ្តុំនៅតាមដងវិថីក្នុងទីក្រុងប៉ារីសប្រទេសបារាំង កាលពីថ្ងៃអាទិត្យកន្លងទៅនេះ ប្រឆាំងទៅនឹងភាពស្របច្បាប់ទៅនឹងការរៀបការមនុស្សភេទដូចគ្នា ស្របពេលដែលការប្រមូលផ្តុំធ្វើបាតុកម្មលើកនេះ គឺជាការប្រមូលផ្តុំបាតុករដ៏ច្រើនបំផុត ចាប់តាំងពីលោកប្រធានាធិបតី François Hollande ចូលកាន់តំណែងមក
ប្រភពដដែលបានបន្ថែមថា មនុស្សប្រមាណជាង ៣៤០,០០០នាក់ បានមកប្រមូលផ្តុំក្នុងការធ្វើបាតុកម្មលើកនេះ ស្របពេលដែលនៅតាមវិថីនានា នៃក្រុងប៉ារីសពួកបាតុករបាននាំគ្នា ហែក្បួនចំនួន៣រៀបចំឡើងដោយក្រុមLA MANIF POUR TOUTមុននឹងលើកគ្នាទៅប្រមូលផ្តុំនៅឯ CHAMP-DE-MARS ចំណែកក្បួនបាតុកម្មទី៤ដឹកនាំធ្វើដោយអង្គការជ្រុលនិយម CIVITAS ។
លើសពីនេះទៅទៀត ប្រភពព័ត៌មានដដែលបានបន្ថែមថា រដ្ឋាភិបាលសង្គមនិយមបារាំងដែលត្រៀមដាក់ជូនសភា និងព្រឹទ្ធសភាអនុម័តច្បាប់ដែលអនុញ្ញាតឱ្យពួកអ្នករួមភេទ ដូចគ្នារៀបការស្របច្បាប់ហាក់ដូចជាប្រកាន់ភាពម៉ឺងម៉ាត់លើ បញ្ហានេះ ទោះបីមានការប្រឆាំងពីមជ្ឈដ្ឋានសង្គមមួយចំនួន ពិសេសពីសំណាក់បណ្តាសមាគមកាតូលិកក៏ដោយ។ រដ្ឋមន្ត្រីយុត្តិធម៌បារាំងលោកស្រីគ្រីស្ទីយ៉ាណាតាអ៊ូ ប៊ីរ៉ាបានប្រកាសយ៉ាងច្បាស់កាលពីថ្ងៃទី១១ មករាថ នឹងការពារគម្រោងច្បាប់នេះ។
គួររំឭកផងដែរថា ទន្តឹមនឹងការដាក់ជូនសភានិងព្រឹទ្ធសភាអនុម័តច្បាប់ដែលអនុញ្ញាតឱ្យពួកអ្នករួមភេទ ដូចគ្នារៀបការស្របច្បាប់នេះ ប្រព្រឹត្តិទៅបានមែននោះ នោះប្រទេសបារាំងនឹងក្លាយជា ប្រទេសទី ១២ ដែលមានមានសិទ្ធស្របច្បាប់នៅក្នុងការរៀបការមនុស្សស្រឡាញ់ភេទដូចគ្នា៕
ដោយ ៖ រិទ្ធីប្រភព ៖ wsj