អន្តរជាតិ ៖ បើតាមការអោយដឹងពីទំព័រសារព័ត៌មានបរទេស ស្កាយ ដែលទើបតែបានចេញផ្សាយកាលពីថ្ងៃពុធ ទី០៧ ខែវិច្ឆិកា កន្លងផុតទៅថ្មីៗនេះ បានបញ្ជាក់អោយដឹងថា បក្សកុម្មុយនីសចិន បានប្រកាសអោយដឹងពីបេក្ខភាព ដែលអាចជាអ្នកដឹកនាំបន្ត គឺលោក Xi Jinping ។
គួរបញ្ជាក់ផងដែរថា ការលើកឡើងនេះ ត្រូវបានធ្វើឡើងនៅក្នុងសមាជបក្សកុមុយនីសចិន ដែលត្រូវបានធ្វើឡើងនៅក្នុងក្រុងប៉េកាំង កាលពីពេលកន្លងទៅនេះ។ លើសពីនេះទៅទៀតបើយោងតាមរបាយការណ៍ដដែលបានបន្ថែមថា លោក Xi Jinping គឺជាបេក្ខភាពតែមួយគត់ដែលត្រូវបានបក្សលើកឡើងធ្វើជារដ្ឋលេខាធិការបក្ស ក៏ដូចជា ប្រធានាធិបតីចិនផងដែរ ។
គួររំឭកផងដែរថា បើនិយាយពីសន្តិសុខក្នុងសង្គមវិញ អាជ្ញាធរមានសមត្តកិច្ចបានខិតខំប្រឹងប្រែងការពារ ក៏ដូចជាពង្រឹង ស្របពេលដែលមានសមាជរបស់បក្សកុមុយនីសចិនមួយនេះ ។ ទន្ទឹមនឹងមានសមាជរបស់បក្សកុមុយនីសចិន នាទីក្រុងប៉េកាំង ក៏មានការអញ្ជើញចូលរួមពីសំណាក់លោកប្រធានាធិបតីចិន Hu Jintao និងលោកនាយករដ្ឋមន្រ្តី Wen Jiabao ។
ដោយឡែក បើងាកក្រឡេកទៅមើលសមាជអំឡុងកិច្ចប្រជុំនាទីក្រុងប៉េកាំងនោះវិញ ប្រធានាធិបតីចិន លោក Hu Jintao ក៏បានផ្តល់នូវអនុសាសន៍ ទាក់ទិនទៅនឹងការជំរុញសេដ្ឋកិច្ចចិនអោយនៅតែក្លាយជាប្រទេសមហាអំណាចសេដ្ឋកិច្ចមួយក្នុងចំណោមប្រទេសមហាអំណាចធំៗលើលោក៕
ដោយ ៖ រិទ្ធីប្រភព ៖ ស្កាយ