ព័ត៌មានបរទេស ៖ ដោយយោងតាមប្រភពសារព័ត៌មានសឹង្ហបុរី channelnewsasia ដែលទើបតែបានចេញផ្សាយកាលពីប៉ុន្មាននាទីមុននេះ បានអោយដឹងថា មកទល់នឹងពេលនេះ ចំនួនជនរងគ្រោះដែលបានស្លាប់បាត់បង់ជីវិត ក្នុងឧបទ្ទេវហេតុបាក់រលំអាគាររោងចក្រ កំពស់ ៨ ជាន់នៅបង់ក្លាដេស្ស បានកើនឡើងដល់ ៤៨២ នាក់ហើយ មកទល់នឹងថ្ងៃសុក្រនេះ បន្ទាប់ពីក្រុមជួយសង្គ្រោះ បានចំណាយពេលដល់ទៅពេញមួយយប់ ដោយទាញយកសាកសពមនុស្ស ៤១ នាក់ ពីគំនរថ្មបាក់បែកនៃអាគារកំពស់ ៨ ជាន់មួយនេះ ។
គួររំឭកផងដែរថា សោកនាដកម្ម បាក់រលំអាគាររោងចក្រដែលមានកំពស់ដល់ទៅ ៨ ជាន់មួយនេះ បានកើតឡើងកាលពីពេលកន្លងទៅ ពោលគឺនៅថ្ងៃទី ២៤ មេសា នៅក្រុង ដាកាប្រទេសបង់ក្លាដេស្ស ដោយបាក់រលំសង្កត់លើកម្មករជាង ៣០០០ នាក់ តែយ៉ាងហោចណាស់ កម្មករប្រមាណជាង ២៤៣៧ នាក់ ក៏ត្រូវបានសង្គ្រោះផងដែរ។
ដោយឡែក ករណីសោកនាដកម្មខាងលើនេះ ទំព័រសារព័ត៌មានយើងខ្ញុំ ក៏ធ្លាប់បានចេញផ្សាយជាច្រើនដងរួចមកហើយ ទាក់ទិននឹងប្រធានបទខាងលើនេះ ស្របពេលដែលសារព័ត៌មានចុងក្រោយ បាននិយាយពី ម្ចាស់អាគារវាយនភ័ណ្ឌ ដែលមានកំពស់ដល់ទៅ ៨ ជាន់នេះ មានឈ្មោះ Mohammed Sohel Rana ត្រូវបានបញ្ជូនទៅក្រុងដាកាហើយតាមរយៈឧទ្ធម្ភាចក្រ ដើម្បីធ្វើការកាត់ទោសទៅតាមផ្លូវច្បាប់ បន្ទាប់ពីកម្មករទាំងអស់ ត្រូវបានបង្ខំចិត្តអោយបំពេញការងាររបស់ខ្លួន នៅក្នុងរោងចក្រមួយនោះ ពីសំណាក់ម្ចាស់រោងចក្រ បើទោះជាមានការធ្វើបាតុកម្មសុំមិនបំពេញការងារ បន្ទាប់ពីរកអោយឃើញថា សំណង់អាគារមួយនេះ មានការបាក់បែកខ្លាំងក៏ដោយ៕
ដោយ ៖ រិទ្ធីប្រភព ៖ channelnewsasia