លោកសង្ឍថៃជាច្រើនអង្គត្រូវបានបញ្ជូនទៅមន្ទីរពេទ្យ បន្ទាប់ពីត្រូវបានវាយប្រហារដោយពពួកសត្វឃ្មុំ ដែលរឿងនេះបានកើតឡើងនាភាគខាងជើងប្រទេសថៃ ។ បើតាមប្រភពពត៌មានបានអោយដឹងថា លោកសង្ឃទាំងនោះមកពីវិហារ Chedi Luang ក្នុងខេត្ត ឈាងម៉ៃ គឺជាទីកន្លែងដែលបានកើតឧបទ្ទេវហេតុ។
បើយោងទៅតាមសារពត៌មាន The Bangkok Post បានអោយដឹងថា ចំនួនលោកសង្ឃដល់ទៅ ៧០ អង្គត្រូវបានបញ្ជូនទៅមន្ទីរពេទ្យ ស្របពេលដែលលោកវេជ្ជបណ្ឌិតបានបញ្ជាក់ថា ចំនូនលោកសង្ឃដែលរងរបួសធ្ងន់មានដល់ទៅ ១៩ អង្គ។ ចៅអធិការវត្តនៅទីនោះបានប្រាប់ដល់ភ្នាក់ងារសារពត៌មានមួយនេះថា លោកសង្ឃចំនួន ៧៦ អង្គត្រូវបានបញ្ជូនទៅមន្ទីរពេទ្យ ៣ ផ្សេងគ្នា។
លើសពីនេះទៅទៀត នាយកចាត់ការទូទៅប្រចាំមន្ទីរពេទ្យ Maharaj Nakorn នៅក្នុងខេត្តឈាងម៉ៃ បាននិយាយថា ៖ លោកសង្ឃចំនួន ៥៣ អង្គកំពុងសំរាកព្យាបាលនៅទីនេះ ស្របពេលដែលមានលោកសង្ឃ ៦ អង្គផ្សេងទៀត បានបញ្ជូនមកដល់ក្នុងសភាពសន្លប់។ ក្រោយពីមានការសំរាកព្យាបាល មានលោកសង្ឃជាច្រើនបានធូរសះស្បើយ។
ដោយឡែក បើយោងតាមសម្តីរបស់ចៅអធិការនៅទីនោះក៏បាននិយាយបន្ថែមថា ៖ ដំបូងយើងគ្មានបញ្ហាជាមួយនិងពួកវានោះទេ តែក្រោយមក វាក៏បានធ្វើការវាយប្រហា រ ដែលមកទល់និងពេលនេះ ពួកយើងក៏មិនទាន់ដឹងអំពីមូលហេតុច្បាស់លាស់ ថាតើមកពីហេតុអ្វីនោះទេ៕
ដោយ ៖ រិទ្ធីប្រភព ៖ nation