ដោយយោងតាមប្រភពសារព័ត៌មានបរទេសដែលចេញផ្សាយនាប៉ុន្មានម៉ោងមុននេះ បានអោយដឹងថា មានយុវសិស្សវ័យ ២០ ឆ្នាំម្នាក់ ហ៊ានប្រថុយជីវិតរបស់ខ្លួន ក្នុងការជួយសង្រ្គោះជីវិតរបស់បុរសម្នាក់ផ្សេងទៀត ក្នុងការប៉ុនប៉ងធ្វើអត្តឃាត ដោយឈរអោយរថភ្លើងបុក ដែលមកទល់និងពេលនេះ បានអោយដឹងថា យុវសិស្សរូបនោះមានរបួសធ្ងន់ទៅនឹងជើងរបស់គេដែលអាចពិការក៏ថាបាន។
យុវសិស្សវ័យ ២០ ឆ្នាំរូបនោះ កំពុងដេកសំរាកព្យាបាលនៅមន្ទីរពេទ្យ
យុវសិស្សវ័យ ២០ ឆ្នាំរូបនោះមានឈ្មោះថា Li Boya ក៏កំពុងតែសម្រាកព្យាបាលជម្ងឺនៅក្នុងមន្ទីរពេទ្យ Qinhuangdao នៅក្នុងខេត្ត Hebei ភាគខាងជើងប្រទេសចិន ។ បើតាមសម្តីរបស់លោកវេជ្ជបណ្ឌិតបានអោយដឹងថា ជើងឆ្វេងរបស់គាត់រងរបួសជាទម្ងន់ ដែលតំរូវអោយធ្វើការកាត់ចោលរីឯ ជើងស្តាំរបស់គាត់វិញ ក៏កំពុងតែស្ថិតនៅក្នុងសភាពមួយយ៉ាប់យ៉ីនផងដែរ តែលោកគ្រូពេទ្យបាននិយាយដោយមានក្តីសង្ឃឹមថា លោកនិងព្យាយាមអោយអស់ពីសមត្ថភាពក្នុងការជួយសង្គ្រោះជើងស្តាំរបស់គាត់ ដូច្នេះ នាពេលអនាគត គាត់និងត្រូវការជើងសិប្បនិម្មិតតែម្ខាង តែប៉ុណ្ណោះ។
លើសពីនេះទៅទៀត បើយោងតាមសម្តីរបស់លោកវេជ្ជបណ្ឌិត Zhang Xu ដែលជានាយកគ្រប់គ្រងទូទៅខាងផ្នែកវះកាត់ ដៃ និង ជើងនៅក្នុងមន្ទីរពេទ្យនេះ បានអោយដឹងថា ៖ ស្ថានភាពរបស់គាត់កំពុងស្ថិតនៅក្នុងការតាមដាន យ៉ាងហោចណាស់ ក្នុងអំឡុងពេល ១ សប្តាហ៏ទៀតទើបអាចដឹងបានថា តើស្ថានភាពជម្ងឺរបស់គេ និងមានការវិវត្តន៏យ៉ាងណានោះ។
គួរបញ្ជាក់ផងដែរថា រឿងហេតុការណ៍ដែលហ៊ានប្រថុយជីវិតក្នុងការជួយសង្គ្រោះបុរសម្នាក់ប៉ុនប៉ងធ្វើអត្តឃាត ដោយឈរអោយរថភ្លើងបុកនេះ បានកើតឡើងនៅវេលាម៉ោង 5:40 នាទីល្ងាច ដែលនៅក្នុងពេលនោះ យុវសិស្សវ័យ ២០ ឆ្នាំដែលមានឈ្មោះថា Li Boya បានឃើញបុរសម្នាក់លោតចុះទៅឈរនៅលើផ្លូវខ្សែរថភ្លើង ដែលមានរថភ្លើងបានជិតមកដល់ផងនោះ ខណៈ ពេលដែលគេបានឃើញបែបនេះ គេក៏លោតចុះទៅជួយ តែជាអកុសលជើងទាំងគូររបស់គេ ត្រូវបានរថភ្លើង បើកកិនពីរលើ ធ្វើអោយកំបុតទាំងពីរ ពោលគឺកំបុតក្រោមត្រឹមក្បាលជង្គង់ចុះក្រោម។
ក្រោយពីបាន កើតហេតុការណ៍មួយនេះ បើតាមទីភ្នាក់ងារសារព័ត៌មាន Beijing News បានអោយដឹងថា អាជ្ញាធរផ្លូវដែក នា ទីក្រុងប៉េកាំង ប្រទេសចិន បានផ្តល់ជាប្រាក់រង្វាន់ ដល់ទៅ $31,700 សំរាប់សកម្មភាពដ៏ក្លាហានរបស់គេមួយនេះ និងសន្យាថា ផ្តល់ការងារសមស្របមួយ ក្រោយពីគេបានបញ្ជប់ការសិក្សារបស់ខ្លួន ។ រីឯ បុរសដែលប៉ុនប៉ងធ្វើអត្តឃាតរូបនោះវិញ ត្រូវបានគេបញ្ជាក់ស្គាល់អត្តសញ្ញាណថា មានឈ្មោះ Liu Shichen មានវ័យ ៤១ ឆ្នាំហើយបើនិយាយពីមូលហេតុដែលគាត់ប៉ុនប៉ងធ្វើអត្តឃាតនោះ ពុំទាន់ដឺងច្បាស់នៅឡើយទេ ដោយវាកំពុងស្តិតនៅក្នុងការស៊ើបអង្កេតនៅឡើយ៕
ដោយ ៖ រិទ្ធីប្រភព ៖ asiaone