ព័ត៌មានអន្តរជាតិ ៖ បើតាមការអោយដឹងពីគេហទំព័រសារព័ត៌មានចិន ដែលបានចេញផ្សាយកាលពី ព្រឹកមិញនេះ បានបញ្ជាក់អោយដឹងថា មានឧបទ្ទេវហេតុគ្រោះថ្នាក់នៅក្នុងអណ្តូងរ៉ែមួយកន្លែងនាប្រទេសចិន នឹងបានសម្លាប់មនុស្សយ៉ាងហោចណាស់ ២០ នាក់។
លើសពីនេះទៅទៀត របាយការណ៍ដដែលបានបន្ថែមអោយដឹងផងដែរថា គ្រោះថ្នាក់មួយនេះបានកើតឡើង កាលពីថ្ងៃទី២៥ កញ្ញា ក្នុងអណ្តូងរ៉ែធ្យូងថ្មមួយនៅខេត្តហ្គានស៊ូ ភាគនិរតី ប្រទេសចិន ។ ផ្នែករដ្ឋបាលខេត្តទទួលបន្ទុកខាងសន្តិសុខការងារបញ្ជាក់ថា ខ្សែកាបដែលយោងក្បាលរថភ្លើងដឹករ៉ែដែលទាញទូរថភ្លើងតូច ២ដឹក កម្មកររ៉ែ ៣៤ នាក់ ចេញពីអណ្តូងរ៉ែស្រាប់តែដាច់ក្រោយពាក់កណ្តាលយប់ក្នុងអណ្តូងរ៉ែ មួយនៃទីក្រុងបៃយីន ។ ទូរថភ្លើងតូចទាំង២នេះបានរអិលហើយក្រឡាប់ជះកម្មករទាំងអស់ ធ្លាក់ក្នុងអណ្តូង។ ក្រុមអ្នកជួយសង្គ្រោះបានរកឃើញកម្មកររ៉ែជួបគ្រោះថ្នាក់ទាំងអស់មុនថ្ងៃត្រង់ថ្ងៃទី២៥ កញ្ញា ខណៈពេលដែល កម្មកររ៉ែ ១៤ នាក់ផ្សេងទៀត ត្រូវរបួសបញ្ជូនទៅកាន់មន្ទីរពេទ្យ ដើម្បីធ្វើការសង្រ្គោះបន្ទាន់។
គួររំឮកផងដែរថា បើយោងតាមក្រុមហ៊ុនដែលធ្វើអាជីវកម្មអណ្តូងរ៉ែនេះ បានបញ្ជាក់អោយដឹងថាខ្សែកាបដែលដាច់នោះ ទើបនឹងប្តូរផ្លាស់កាលពីថ្ងៃទី ២៩ កក្កដា ក៏ប៉ុន្តែយោងតាមលទ្ធផលដំបូងនៃការស៊ើបអង្កេត បានបង្ហាញអោយដឹងថា មកពីទូទាំង ២ នោះ ដឹកលើសចំណុះ ក្រោយគ្រោះថ្នាក់នេះ អាជ្ញាធរខេត្តហ្គានស៊ូបានចេញបញ្ជាឱ្យបិទបណ្តោះអាសន្ននូវអណ្តូង រ៉ែធ្យូងថ្មមួយនេះ ក្នុងការធ្វើអាជីវកម្មរបស់ខ្លួន៕
ដោយ ៖ ពិសិដ្ឋ ប្រភព ៖ chinadaily