ដូចជាព័ត៌មានដែលចេញផ្សាយរួចមកហើយ កីឡាករ Robin Van Persie ត្រូវបានគ្រូបង្វឹកលោក Sir Alex អនុញ្ញាតឲ្យជ្រើសរើសលេខអាវថ្មី នៅពេលរដូវកាលឆ្នាំនេះបានបញ្ចប់។ តាមមនុស្សជាច្រើនប៉ាន់ស្មាន ក្នុងនាមខ្លួនជាកីឡាករខ្សែប្រយុទ្ធឆ្នើមមួយរូប Van Persie ប្រាកដជានឹងជ្រើសរើសអាវប្រកួតលេខ 9 ជំនួសឲ្យលេខ 20 ដែលកំពុងពាក់សព្វថ្ងៃ។ ជាក់ស្តែង កីឡាករជនជាតិហូឡង់ម្នាក់នេះ បានគិតផ្សេងទៅវិញ។
ផ្តល់បទសំភាសន៍មុនការប្រកួតជាមួយ Chelsea, ខ្សែប្រយុទ្ធដែលកំពុងតែនាំមុខគេក្នុងតារាងស្តេចបំប៉ោងសំណាញ់ (ពានរង្វាន់ស្បែកជើងមាស) Premier League ឆ្នាំនេះ បានឲ្យដឹងថា: “ខ្ញុំនឹងមិនផ្លាស់ប្តូរលេខអាវទេ។ ខ្ញុំនៅតែចង់ពាក់អាវលេខ 20 ដដែល ព្រោះតែដើម្បីអ្នកគាំទ្រ (Fan) ខ្ញុំទាំងអស់គ្នា”។
“ខ្ញុំត្រូវបានអនុញ្ញាតឲ្យជ្រើសរើសអាវលេខ 9 សំរាប់រដូវកាលក្រោយ។ ប៉ុន្តែខ្ញុំមិនធ្វើដូច្នេះទេ។ ខ្ញុំកំពុងតែមានអារម្មណ៍សប្បាយរីករាយ ជាមួយនឹងអាវលេខ 20 សព្វថ្ងៃនេះ ហើយគ្រប់រឿងកំពុងតែប្រព្រឹត្តិទៅបានយ៉ាងល្អ ពេលខ្ញុំពាក់លេខអាវនេះ។ ដូច្នេះ វាគ្មានហេតុផលអ្វីដែលខ្ញុំ ត្រូវផ្លាស់ប្តូរឡើយ”។
“ជាងនេះទៅទៀត ខ្ញុំធ្វើនេះ ក៏ព្រោះតែអ្នកគាំទ្រខ្ញុំទាំងអស់គ្នាដែរ។ ពួកគាត់បានទិញ អាវលេខ 20របស់ខ្ញុំរួចអស់ហើយ។ ខ្ញុំមិនចង់ឲ្យពួកគាត់ ពិបាក ក៏ដូចជាខាតបង់លុយបន្ថែម ក្នុងការទិញលេខផ្សេងឡើយ។ ជាមួយលេខអាវនេះ ខ្ញុំបានជួយ Man United ដណ្តើមបានពានរង្វាន់Premier Leagueលើកទី 20 ជាប្រវត្តិសាស្រ្ត សំរាប់ខ្ញុំ វាគឺជាពាន Primier League ដំបូង។ គ្រប់រឿងពិតជាអស្ចារ្យ” ។Van Persie រីករាយបញ្ជាក់ឲ្យដឹង៕
ដោយ៖ សិលាប្រភព៖ 24h