ព័ត៌មានអន្តរជាតិ ៖ យោងតាមអត្ថបទផ្សាយ ពីគេហទំព័រសារព័ត៌មានបរទេស CNN ដែលទើបតែបានចេញផ្សាយកាលពីប៉ុន្មានម៉ោងមុននេះ បន្តិចអោយដឹងថា មនុស្ស ៥ នាក់ ក្នុងនោះមានក្មេងតូចផងនោះ បានស្លាប់បាត់បង់ជីវិត បន្ទាប់ពីជួបគ្រោះថ្នាក់ធ្លាក់ឧទ្ធម្ភាគចក្រនៅឯរដ្ឋ Pennsylvania សហរដ្ឋអាមេរិក។
យ៉ាងណាមិញ បើយោងតាមអ្នកធ្វើសពវិភាគឈ្មោះ Tom Kukuchka អោយដឹងថា ក្នុងចំណោមអ្នកដែលបានស្លាប់បាត់បង់ជីវិត ក្នុងនោះរួមមានក្មេងតូចមួយនាក់ ស្រ្តីម្នាក់ និងបុរស ៣ នាក់ ។ លើសពីនេះទៅទៀត ប្រភពសារព័ត៌មានដដែល ក៏បានដកស្រង់សម្តីលោក Holly Baker ជាមន្រ្តីរដ្ឋបាលសម្ព័ន្ធអាកាសចរ អោយដឹងផងដែរថា ឧទ្ធម្ភាគចក្រមួយគ្រឿង ដែលផ្ទុកទៅដោយក្រុមមនុស្ស ៥ នាក់ បានបាត់កាលពីថ្ងៃសៅរ៍សប្តាហ៍កន្លងទៅ។
គួររំឭកផងដែរថា ឧទ្ធម្ភាគចក្រមួយគ្រឿងនេះ ធ្វើដំណើរហោះចេញ ពីអាកាសយានដ្ឋាន Greater Binghamton ទីក្រុងញ៉ូវយ៉ក ឆ្ពោះទៅកាន់អាកាសយានដ្ឋាន Jake Arner Memor-ial រដ្ឋ Pennsylvania សហរដ្ឋអាមេរិក។
លោក Holly Baker បញ្ជាក់បន្ថែមថា បន្ទាប់ពីមានការតាម ដានស៊ើបអង្កេត ក្រោយពីបានដឹងថា ឧទ្ធម្ភាគចក្រមួយគ្រឿងនេះ បានបាត់ខ្លួននោះ មកទល់នឹងថ្ងៃអាទិត្យវេលារសៀលម្សិលមិញនេះ ទើបបានរកអោយឃើញថា តាមពិតទៅវាបានជួបគ្រោះថ្នាក់ធ្លាក់ នៅក្នុងតំបន់ព្រៃឈើមួយកន្លែង។
ទន្ទឹមនឹងនេះ ក្រុមមន្រ្តីជំនាញក៏កំពុងធ្វើការតាមដានស៊ើបអង្កេត រកមូលហេតុពិតនៃការធ្លាក់លើកនេះ បន្ទាប់ពីឧទ្ធម្ភាគចក្រមួយគ្រឿងនេះ បានផ្តាច់ការទាក់ទងជាមួយនឹងស្ថានីយ៍កាលពីរាត្រីថ្ងៃសៅរ៍កន្លងទៅ ខណៈមានអាកាសធាតុអាក្រក់នោះ៕
ដោយ ៖ ពិសីប្រភព ៖CNN