មេដឹកនាំដ៏មានអំណាចទាំងពីររូបរបស់រុស្ស៊ី រួមជាមួយនឹងអ្នកគាំទ្រប្រមាណជា ១០០.០០០នាក់បានចូលរួមធ្វើយាត្រានៅតាមដងផ្លូវក្នុងក្រុង Moscow ក្នុងទិវាពលកម្មអន្ដរជាតិកាលពីថ្ងៃទី ១ ឧសភាកន្លងទៅ ខណៈដែលបាតុកម្មជាច្រើនក្នុងពិភពលោកត្រូវបានគេធ្វើឡើង។
លោក Vladimir Putin និង Dmitry Medvedev ដឹកនាំក្បួនដង្ហែក្នុងទិវាពលកម្មអន្ដរជាតិ
AFP បានអោយដឹងថា ជាមួយនឹងសម្លេងតន្ដ្រី និងពណ៌ចម្រុះនៃបដា លោកនាយករដ្ឋមន្ដ្រីVladimir Putin និងលោក Dmitry Medvedev ប្រធានាធិបតិរុស្ស៊ីដែលជិតនឹងចប់អាណត្តិរបស់ខ្លួនបានដឹកនាំការធ្វើយាត្រា ឆ្លងកាត់មហាវិថីនានានៅក្នុងក្រុង Moscow ។
នេះគឺជាលើកទីមួយហើយដែលក្រុមមេដឹកនាំរុស្ស៊ីបានចូលរួមក្នុងការធ្វើយាត្រារំឮកទិវាពលកម្មអន្ដរជាតិ ១ ឧសភា ដែលធ្លាប់ជាថ្ងៃពិសេសរបស់សហភាពសូវៀត។ កាលពីឆ្នាំ១៩៩០ ប្រទេសរុស្ស៊ីក៏បានធ្វើពិធីបែបនេះផងដែរ គឺនៅក្រោមការដឹកនាំរបស់លោកប្រធានាធិបតិ Boris Yeltsin ។
ក្បួនដង្ហែរបស់ក្រុមបាតុករនៅកម្ពុជាក្នុងទិវាពលកម្មអន្ដរជាតិ
ក្នុងទិវាពលកម្មអន្ដរជាតិនេះដែរ ក្រុមប្រឆាំងរបស់រុស្ស៊ីបានសម្រេចចិត្តមិនធ្វើបាតុកម្មនៅក្រុង Moscow ប៉ុន្ដែពួកគេសំចៃកម្លាំងដើម្បីធ្វើមហាបាតុកម្មមួយនៅថ្ងៃទី ៦ឧសភា តាមគម្រោង អ្នកចូលរួមនឹងអាចឡើងដល់ ១០០.០០០នាក់។
ឆ្លៀតក្នុងឱកាសនេះ នៅបណ្ដាប្រទេសក្នុងពិភពលោក ក្បួនបាតុកម្មធំៗត្រូវបានគេធ្វើឡើង និងបង្ហែនៅតាមដងផ្លូវដើម្បីទាមទារចំណុចដែលពួកគេចង់បាន ក្នុងនោះមានប្រទេស ក្រិក អេស្ប៉ាញ ព័រទុយហ្គាល់។ល។
ចលនា Occupy Wall Street នៅអាមេរិក ក៏មានឱកាសងើបឡើងវិញ
ចំណែកនៅអាមេរិក ចលនា Occupy Wall Street ក៏បានរីកធំឡើងមកវិញដោយយកក្រុងNew York ជាចំណុចកណ្ដាល។ រីឯនៅក្នុងអាស៊ីវិញ គេក៏ឃើញមានបាតុកម្មជាច្រើនត្រូវបានធ្វើឡើងក្នុងថ្ងៃទី ១ឧសភា មានដូចជា ហុងកុង ឥណ្ដូនេស៊ី និងហ្វីលីពីន និងកម្ពុជាជាដើម៕
ដោយ ៖ សូរីយ៉ាប្រភព ៖ AFP/VE