ព័ត៌មានអន្តរជាតិ ៖ យោងតាមការដកស្រង់អត្ថបទផ្សាយ ពីទំព័រសារព័ត៌មានបរទេស ស្កាយទើបតែបានចេញផ្សាយ កាលពីប៉ុន្មានម៉ោងមុននេះ អោយដឹងថា ក្រុមមនុស្សដែលជាអ្នកធ្វើការនៅលើកាប៉ាល់ជាង ៣០ នាក់ ត្រូវបានជួយសង្គ្រោះ បន្ទាប់ពីកាប៉ាល់ធន់ធំមួយគ្រឿងបានលិច ក្រោយពីបើកទៅបុកនឹងថ្ម។
គួរបញ្ជាក់ផងដែរថា ករណីកាប៉ាល់បុកថ្ម ធ្លាយលិចខាងលើនេះ បានកើតឡើងនៅឯឈូងសមុទ្រ ប្រទេសអៀរឡង់ (Ireland) ។ លើសពីនេះ ប្រភពសារព័ត៌មានដដែលបន្ថែមថា ក្នុងរយៈពេល ៣០ នាទីក្រោយ ក្រុមជួយសង្រ្គោះក៏បានចុះទៅដល់កន្លែងកើតហេតុ ដើម្បីជាការអន្តរាគមន៍។ យ៉ាងណាមិញ ក្រោយពីបានកើតមានឡើងនូវគ្រោះថ្នាក់មួយនេះ ពុំមានបុគ្គលណាមួយ មានការទទួលរងរបួសធ្ងន់ ដោយមានការគំរាមគំហែងដល់អាយុជីវិតនោះទេ។
គួររំឭកផងដែរថា កាប៉ាល់មួយគ្រឿងដែលបានធ្លាយលិច ក្រោយបុកនឹងថ្មខាងលើនេះ គឺជាកាប៉ាល់បង្វិក ការធ្វើដំណើរតាមសមុទ្រ ដល់ក្រុមមនុស្សដែលមានសមាជិកដល់ទៅ ២៣ នាក់ មកពីប្រទេសអៀរឡង់ ហូឡង់ អង់គ្លេស អេស៉្បាញ់ បារាំង ប៉ែលហ្ស៊ិក ក្នុងនោះមាននាវិក ៧នាក់ផ្សេងទៀតផងដែរ៕
ដោយ ៖ ពិសិដ្ឋប្រភព ៖ ស្កាយ