ព័ត៌មានអន្តរជាតិ ៖ ទីភ្នាក់ងារសារព័ត៌មានបរទេស ស្កាយ កាលពីប៉ុន្មានម៉ោងមុននេះ បានគូសបញ្ជាក់អោយដឹងថា នៅឯប្រទេសអ៊ីតាលីឯណោះវិញ មានសោកនាដកម្មដ៏រន្ធត់មួយបានកើតឡើងនោះគឺ ក្រុមមនុស្សដែលជាភ្ញៀវទេសចរ ៣៧ នាក់ បានស្លាប់បាត់បង់ជីវិតយ៉ាងអណោចអធម ក្រោយពីរថយន្តដឹកអ្នកដំណើរមួយគ្រឿង បោលនឹងធ្លាក់ចូលជ្រោះដែលមានជម្រៅដល់ទៅ ជាង ៣០ ម៉ែត្រឯណោះ។
លើសពីនេះ ប្រភពសារព័ត៌មានដដែលបានអះអាងបន្ថែមអោយដឹងផងដែរថា រថយន្តធន់ធំដែលដឹកអ្នកដំណើរមួយគ្រឿងនេះ បានបើកបុកឡានជាច្រើនគ្រឿង មុននឹងបាត់បង់ម្ចាស់ការណ៍ បើកចុះជម្រាល ធ្លាក់ចូលទៅក្នុងជ្រោះ ជិតក្រុង Naples ប្រទេសអ៊ីតាលី។
ដោយឡែក យ៉ាងហោចណាស់ មនុស្ស ១១ នាក់បានទទួលរងរបួស ក្នុងនោះក៏មានក្មេងៗតូចផងដែរ ខណៈអ្នករងរបួសធ្ងន់ពីររូប ត្រូវបានបញ្ជូនទៅកាន់មន្ទីរពេទ្យ ដើម្បីធ្វើការសង្គ្រោះបន្ទាន់ ។ បើតាមការអោយដឹងពីក្រុមមន្រ្តីជំនាញ ចុះជូយសង្គ្រោះអោយដឹងថាអ្នកបើករថយន្តទេសចរណ៍មួយគ្រឿងនេះ ទំនងជាស្លាប់បាត់បង់ជីវិតនៅក្នុងសោកនាដកម្មនេះបាត់ទៅហើយ។
យ៉ាងណាមិញ បើយោងតាមសម្តីសាក្សី ត្រូវជាជនរងគ្រោះម្នាក់ បានបញ្ជាក់បន្ថែមអោយដឹងថា មានពេលមួយនេះ គេបានលាន់លឺសម្លេង ទំនងជាឡានបែកកង់ លុះបន្តិចក្រោយមក ក៏បានកើតមានឡើង នូវសោកនាដកម្ម មួយនេះតែម្តង ខណៈពេលដែលបើកចុះជម្រាលនោះ។
គួររំឭកផងដែរថា រថយន្តប៊ើសធន់ធំ ដឹកអ្នកទេសចរមួយគ្រឿងនេះ មានផ្ទុកអ្នកដំណើរទាំងអស់រួមមានសមាជិកជាង ៤៩ នាក់។ ភ្លាមៗនោះ អាជ្ញាធរមូលដ្ឋានក៏បានចុះទៅដល់កន្លែងកើតហេតុ ដើម្បីធ្វើការជួយអន្តរាគមន៍ និង តាមដានស៊ើបអង្កេតរកមូលហេតុពិតដែលបានបណ្តាលអោយកើតមានឡើងនូវសោកនាដកម្មមួយនេះ៕
ដោយ ៖ រិទ្ធីប្រភព ៖ ស្កាយ