ព័ត៌មានអន្តរជាតិ ៖ ត្រីដូហ្វីន (dolphin) រងរបួសមួយក្បាល បានដាច់ហ្វូង និងហែលក្បែរឆ្នេរសមុទ្រ Hainan ប្រទេសចិន ត្រូវបានរកឃើញថា បានស្លាប់បាត់បង់ជីវិត បន្ទាប់ពីមិនមានការអើពើជួយសង្គ្រោះអ្វីនោះទេ តែគេបែរជាឃើញមានក្រុមមនុស្សដែលជាអ្នកទេសចរបាននាំគ្នា ចាប់វាចេញពីផ្ទៃទឹកលេង និងថតរូបលេង។ លុះបន្តិចក្រោយមក ត្រីដូហ្វីនមួយក្បាលនេះ ក៏បានស្លាប់ ក្រោយហួរឈាមចេញពីមុខរបួសច្រើនពេក នេះបើយោងតាមការដកស្រង់អត្ថបទផ្សាយ ពីទំព័របរទេស singaporeseen ។
លើសពីនេះ ប្រភពសារព័ត៌មានដដែលបន្ថែមថា ករណីខាងលើ បានកើតឡើងកាលពីថ្ងៃទី ១៦ កន្លងទៅ ។ យ៉ាងណាមិញ បើនិយាយពីមូលហេតុ ដែលនាំអោយត្រីដូហ្វីនមួយក្បាលនេះ ទទួលរងរបួសដល់ថ្នាក់ហូរចេញឈាមដ៏ច្រើនបែបនេះនោះ ទំនងមកពីការហែលទៅបុកនឹងទូកអ្នកនេសាទ។
ដោយឡែក បើនិយាយពីរូបថតមួយសន្លឹកខាងលើនេះវិញ បន្ទាប់ពីមានការសាយភាយក្នុងប្រព័ន្ធអ៊ិនធើណេត មតិរិះគន់ជាច្រើនត្រូវបានលើកឡើងព្រមៗគ្នា (Dolphins, as highly evolved mammals, have an IQ only a little lowe r than humans. But those people in the pictures are worse than pigs . ) ខណៈពេលដែលពួកគេបែរជាសប្បាយក្នុងការថតរូប ជាមួយត្រីមួយក្បាលនេះទៅវិញ ស្របពេលដែលវាក៏កំពុងតែទទួលរងរបួសបែបនេះនោះ។
គួររំឭកផងដែរថា បើទោះជាមានមតិរិះគន់ តិះដៀល ក៏ដូចជាជេរប្រមាថក្រុមអ្នកទេសចរមួយក្រុមនេះក៏ដោយ មកទល់នឹងពេលនេះ មិនទាន់មានប្រភពផ្លូវការណាមួយចេញផ្សាយអោយដឹងថាតើ ពួកគេនឹងត្រូវប្រឈមចំពោះមុខច្បាប់ យ៉ាងណានៅឡើយនោះទេ៕
ដោយ ៖ រិទ្ធីប្រភព ៖ singaporeseen