ព័ត៌មានអន្តរជាតិ ៖ បើតាមការអោយដឹងពីទំព័រសារព័ត៌មានបរទេស ដែលទើបតែបានចេញផ្សាយកាលពីប៉ុន្មានម៉ោងមុន អោយដឹងថា មកទល់នឹងពេលនេះ អ្នកដែលបានស្លាប់បាត់បង់ជីវិតដោយសារតែព្រុះព្រិលបោកបក់ទូទាំងសហរដ្ឋអាមេរិក កើនឡើងដល់ ១៦ នាក់ហើយ ។
ប្រភពដដែលបន្ថែមថា រលកធាតុអាកាសត្រជាក់ខ្លាំង ដែលវាយប្រហារចាប់តាំងពី ប៉ុន្មានថ្ងៃមកហើយលើសហរដ្ឋអាមេរិក ឈូងសមុទ្រម៉ិចស៊ិក រហូតដល់តំបន់បឹងធំបណ្តាលឱ្យមនុស្សស្លាប់ជាច្រើននាក់ ហើយខ្យល់ត្រជាក់ខ្លាំងនោះ កំពុងតែបោកបក់សំដៅទៅភាគខាងកើតកាលពីថ្ងៃទី២៦ ធ្នូ ញ៉ាំងឱ្យមានការលុបចោលជើងហោះហើរជាច្រើននៃយន្តហោះ ។
គួររំឭកផងដែរថា ផ្នែកឧតុនិយមសហរដ្ឋអាមេរិកបានព្រមានពីលក្ខខណ្ឌនៃការ ធ្វើដំណើរប្រកបដោយគ្រោះថ្នាក់បណ្តាលមកពីព្រិល និងទឹកកកគ្របដណ្តប់លើផ្លូវថ្នល់ទាំងឡាយរួចបានប្រាប់ឱ្យប្រយ័ត្នចំពោះទម្ងន់ព្រិលទៅលើដើមឈើនិងហេដ្ឋារចនាសម្ព័ន្ធអគ្គិសនីដែលអាចឱ្យដើមឈើបាក់និង ដាច់ខ្សែភ្លើងឆក់។ ការព្រមានទាំងឡាយត្រូវបានធ្វើចំពោះប្រជាជនយកល្អស្ថិតនៅក្នុងផ្ទះជាជាងចេញក្រៅខណៈមានខ្យល់យ៉ាងខ្លាំងហើយ សីតុណ្ហភាពធ្លាក់ទាបបំផុត ។ ក្រុមឧតុនិយមព្យាករណ៍ថា ព្រិលអាចមានកម្រាស់ដល់ទៅ៤៦សង្ទីម៉ែត្រនៅភាគឦសានប្រទេស ពីរដ្ឋញូវយ៉ករហូតដល់រដ្ឋមេន ។
គួរបញ្ជាក់ផងដែរថា កាលពីរសៀលថ្ងៃទី ២៦ ធ្នូ ជើងហោះហើរដល់ទៅជិត១.០០០ជើងរបស់យន្តហោះត្រូវលុបចោល បន្ទាប់ពីលុបចោលមុននោះ៥០០ជើងមក ។ នេះជាការអះអាងរបស់ក្រុមហ៊ុន FLIHT AWARS ដែលតាមដានលក្ខន្តិកៈ នៃការហោះហើរខណៈព្យុះព្រិលត្រូវ វាយប្រហារលើទីក្រុងញូវយ៉ក ។ មនុស្សជាង ២០០.០០០នាក់កាលពីថ្ងៃទី២៦ ធ្នូ ស្ថិតក្រោមធាតុអាកាសត្រជាក់ខ្លាំងហើយគ្មានភ្លើងប្រើពេល ចរន្តអគ្គិសនីដាច់នៅរដ្ឋអាឡាបាម៉ា និងមីស៊ីស៊ីពី ៕
ដោយ ៖ ពិសីប្រភព ៖ cbc