ក្រុមមន្ដ្រីមានសមត្ថកិច្ច មកលេង ផ្ទះរបស់លោក Sarkozy និងលោកស្រី Carla Bruni ដើម្បីធ្វើការស៊ើបអង្កេតអំពីខ្ទង់ប្រាក់ជំនួយខុសច្បាប់នៅក្នុងយុទ្ធនាការឃោសនាបោះឆ្នោតកាលពីឆ្នាំ ២០០៧ របស់លោក។
លោក Sarkozy កំពុងត្រូវបាននគរបាលស៊ើបអង្កេត ដោយសារតែការចោទប្រកាន់របស់លោកស្រី Liliane Bettencourt ថា ខ្លួនបានជូនប្រាក់ជាច្រើនទៅអោយលោក Sarkozy និងជំនួយការរបស់លោក នៅក្នុងយុទ្ធនាការឃោសនាបោះឆ្នោតកាលពីឆ្នាំ ២០០៧ ដែលក្រោយមក លោក Sarkozy ក៏បានទទួលជ័យជំនះ និងក្លាយជាប្រធានាធិបតិរបស់បារាំងអណតិ្ដមុន។
ក្រុមនគរបាលស៊ើបអង្កេតក៏បានធ្វើការត្រួតពិនិត្យភូមិគ្រឹះរបស់លោកស្រី Bruni ក្រុមហ៊ុនផ្ដល់សេវាកម្មផ្នែកច្បាប់ដែលលោក Sarkozy ធ្លាប់បានជួល រួមទាំងករិយាល័យរបស់អតីតប្រធានាធិបតិផងដែរ។
លោក Sarkozy បានទទួលបរាជ័យនៅចំពោះមុខលោក Hollande ក្នុងការបោះឆ្នោតជ្រើសរើសប្រធានាធិបតិ កាលពីថ្ងៃទី ១៦ឧសភា។ មុនការបោះឆ្នោត មានពាក្យចចាមអារ៉ាមថា ចៅក្រមJean-Michel Gentil នឹងស៊ើបការណ៍លើខ្ទង់ប្រាក់ជំនួយខុសច្បាប់កាលពីឆ្នាំ ២០០៧។ លោកJean-Michel Gentil ក៏នឹងធ្វើការស៊ើបអង្កេតទៅលើករណីអ្នកជំនួយការរបស់មហាសេដ្ឋី Liliane Bettencourt ដើម្បីរកអោយឃើញថា អ្នកជំនួយការនេះ បានប្រើប្រាស់ភាពចាស់ជរារបស់ខ្លួន ដើម្បីប្រមូលប្រយោជន៍ផ្នែកហិរញ្ញវត្ថុ ដែរ ឬអត់។ គួរបញ្ជាក់ថា នៅក្នុងករណីនេះ មានមនុស្សចំនួន ១១នាក់កំពុងត្រូវបានចោទប្រកាន់។
មនុស្សមួយចំនួនដែលធ្លាប់ធ្វើការអោយលោកស្រី Bettencourt និងស្វាមី បានបង្ហើបអោយដឹងថា លោក Sarkozy ធ្លាប់ទៅកាន់ភូមិគ្រឹសនៅ Neuilly ដោយស្ងាត់ៗ យ៉ាងតិច ២លើក នៅមុនពេលធ្វើការឃោសនារកសម្លេងឆ្នោត កាលពីឆ្នាំ ២០០៧។
ទោះជាយ៉ាងនេះក្ដី លោក Thierry Herzog ដែលជាមេធាវីរបស់លោក Sarkozy បានផ្ញើសៀវភៅកំណត់ហេតុ បង្ហាញពីសកម្មភាពមុនការឃោសនា កាលពីឆ្នាំ ២០០៧ របស់លោក Sarkozy ទៅអោយលោកចៅក្រម។ លោក Thierry Herzog ថ្លែងថា នៅក្នុងសៀវភៅកំណត់ហេតុនោះ មិនមានភ័ស្ដុតាងណាមួយ បង្ហាញថា កូនក្ដីរបស់លោក បានទទួលខ្ទង់ប្រាក់ជំនួយខុសច្បាប់នោះទេ៕
ដោយ ៖ សូរីយ៉ាប្រភព ៖ rt/zing