ម៉ិចសិក ៖ មនុស្ស ២០ នាក់ស្លាប់ ខណៈច្រើននាក់ផ្សេងទៀតបានរងរបួសជាទម្ងន់ បន្ទាប់ពីរថយន្តដឹកសាំងល្បឿនលឿនមួយ បានបុកនិងផ្ទុះឆេះយ៉ាងសន្ធោសន្ធៅ តាមបណ្តោយផ្លូវហាយវេ ប្រទេសម៉ិចសិក កាលពីថ្ងៃអង្គារកន្លងទៅ នេះបើយោងតាមការដកស្រង់អត្ថបទផ្សាយ របស់គេហទំព័រសារព័ត៌មានបរទេស CNN ។
លើសពីនេះ បើយោងតាមសម្តីមន្រ្តីផ្លូវការមកពីនាយកដ្ឋានសុខសុវត្ថិភាពផ្លូវគោកលោកSalvador Neme បានអោយដឹងថា ក្នុងចំណោចជនរងគ្រោះដែលបានស្លាប់បាត់បង់ជីវិតក្នុងនោះ មានកុមារតូចពីររូបផងដែរ។
គួររំឭកផងដែរថា ប្រភពសារព័ត៌មានផ្លូវការ Notimex បានបញ្ជាក់យ៉ាងច្បាស់ថា មូលហេតុដែលបណ្តាលអោយកើតមានឡើងនូវសោកនាដកម្មមួយនេះនោះគឺថា មកពីរថយន្តដឹកសាំងមួយគ្រឿងនេះ ស្ថិតនៅក្នុងសភាពល្បឿនលឿនពេក ដែលបានបណ្តាលអោយអ្នកបើកបរបាត់បង់ម្ចាស់ការ រហូតបានទៅបុកផ្ទះប្រជាពលរដ្ឋ ក៏ដូចជាឡានមួយចំនួនផ្សេងទៀត ដែលបន្តិចក្រោយមកក៏បានឆាបឆេះយ៉ាងសន្ធោសន្ធៅតែម្តង។
មួយម៉ោងក្រោយមក បន្ទាប់ពីបានកើតមានឡើងនូវសោកនាដកម្មមួយនេះ មនុស្ស ២៣នាក់ ត្រូវបានបញ្ជូនទៅកាន់មន្ទីរពេទ្យ ខណៈ ៨ នាក់ស្ថិតនៅក្នុងសភាពរបួសធ្ងន់ ដោយឡែក អ្នកបើកបរក៏ទទួលរងរបួសធ្ងន់ ក៏ត្រូវបានបញ្ជូនទៅកាន់មន្ទីរពេទ្យ តែស្ថិតនៅក្រោមការចាប់ឃាត់ខ្លួន។
គួរបញ្ជាក់ផងដែរថា សោកនាដកម្មមួយនេះ បានធ្វើអោយប្រជាជន ១០០ នាក់បាត់បង់ទីជម្រក បន្ទាប់ពីអគ្គីភ័យឆេះយ៉ាងសន្ធោសន្ធៅមួយនេះ បានបំផ្លាញផ្ទះប្រជាពលរដ្ឋដល់ទៅ ៤៥ ខ្នង និងរថយន្តដល់ទៅ ១៦ គ្រឿង៕
ដោយ ៖ ពិសិដ្ឋប្រភព ៖ CNN