ព័ត៌មានអន្តរជាតិ ៖ រកឃើញឡាំងពោរពេញទៅដោយក្បាលមនុស្ស នៅឯអាកាសយានដ្ឋានអន្តរជាតិ Chicago សហរដ្ឋអាមេរិក កាលពីថ្ងៃច័ន្ទកន្លងទៅនេះ នេះបើយោងតាមសេចក្តីរាយការណ៍ព័ត៌មានពីគេហទំព័របរទេស ស្កាយ កាលពីម្សិលមិញនេះ។
គួរបញ្ជាក់ផងដែរថា មកទល់នឹងពេលនេះ ក្រុមមន្រ្តីប៉ូលីសមិនទាន់ហ៊ានអះអាងនៅឡើយទេថាតើវាគឺជាអំពើមនុស្សឃាត ឬក៏ជាគំរូសំណាកនៃការវិភាគកាយវិទ្យា បន្ទាប់ពីបានរកឃើញឡាំងមួយពោរពេញទៅដោយក្បាលមនុស្សច្រើនជាង ១០ ក្បាល បានដឹកមកពីទីក្រុងរ៉ូម ប្រទេសអ៊ីតាលី។
លើសពីនេះទៅទៀត បើយោងតាមសម្តីលោកស្រី Mary Paleologos ដែលជាអ្នកនាំពាក្យការិយាល័យវិភាគកាយវិទ្យា Cook County Medical Examiner បានអោយដឹងថា វាអាចនឹងធ្វើការដឹកជញ្ជូនទៅបានតាមលក្ខណៈស្របច្បាប់ បើសិនណាមានកិច្ចព្រមព្រៀងច្បាស់លាស់ក៏ដូចជា ប្រើវាក្នុងន័យវិជ្ជមាន ពោលគឺជាគំរូសំណាកនៃការវិភាគកាយវិទ្យា ។
គួររំឭកផងដែរថា តួខ្លួននៃសាកសពក្បាលមនុស្សទាំងនោះ ត្រូវបានបញ្ជូនទៅការិយាល័យវិភាគកាយវិទ្យា Cook County Medical Examiner ដើម្បីធ្វើការតាមដានស៊ើបអង្កេត រង់ចាំសេចក្តីសំរេចជាផ្លូវការថាតើគួរធ្វើបែបណាជាមួយនឹងសាកសពទាំងនោះ។
ក៏មានការភ្ញាក់ផ្អើល ពីក្រុមមនុស្សនៅក្នុងអាកាសយានដ្ឋានមួយនេះផងដែរ តែបើយោងតាមសម្តីលោក Brian Bell ដែលជាអ្នកនាំពាក្យមកពីក្រសួងសន្តិសុខសង្គមបានបញ្ជាក់ថាវាមិនជាការភ្ញាក់ផ្អើលអ្វីនោះទេ ក៏ព្រោះតែកន្លងមកក៏មានការដឹកជញ្ជូនស្រដៀងគ្នានេះផងដែរនៅឯកំពង់ផែ ស្របពេលដែលវាត្រូវបានយកទៅធ្វើការវិភាគកាយវិទ្យា៕
ដោយ ៖ រិទ្ធីប្រភព ៖ ស្កាយ