ព័ត៌មានអន្តរជាតិ ៖ បើយោងតាមការដកស្រង់ អត្ថបទផ្សាយពីគេហទំព័រសារព័ត៌មានបរទេស straitstimes ដែលទើបតែបានចេញផ្សាយកាលពីពេលកន្លងទៅនេះ បានគូសបញ្ជាក់អោយដឹងថា នៅឯប្រទេសសឹង្ហបុរីឯណោះវិញ កាលពីសប្តាហ៍កន្លងទៅ អត្រានៃអ្នកមានជម្ងឺគ្រុនឈាម បានកើនឡើងខ្ពស់ជាខ្លាំង បើទោះជាមានការខិតខំប្រឹងប្រែងអោយស្ថិតនៅក្រោមការគ្រប់គ្រងយ៉ាងណាក៏ដោយ។
ប្រភពសារព័ត៌មានដដែល បានគូសបញ្ជាក់បន្ថែមអោយដឹងផងដែរថា កាលពីសប្តាហ៍មុននេះ មនុស្ស ៧៥៦ នាក់ មកពីទូទាំងប្រទេស បានមានជម្ងឺគ្រុនឈាម វាគឺជាអត្រាមួយខ្ពស់បំផុតក្នុងទំព័រប្រវតិ្តសាស្រ្តសឹង្ហបុរី បើធៀបទៅនឹងអត្រាខ្ពស់ និង អាក្រក់បំផុតកាលពីឆ្នាំ២០០៥ ខែកញ្ញា កើនលើសដល់ទៅ ៤៣ នាក់ ខណៈពេលដែលគ្រានោះ មនុស្ស ២៥ នាក់បានស្លាប់បាត់បង់ជីវិត។
ដោយឡែក នៅក្នុងឆ្នាំនេះ បើតាមប្រភពសារព័ត៌មានបញ្ជាក់ថា បុរសម្នាក់ មានវ័យ ២០ឆ្នាំ និងមានឈ្មោះ Ang Yong Han បានស្លាប់បាត់បង់ជីវិត បន្ទាប់ពីមានការវាយប្រហារពីសំណាក់ជម្ងឺ ដ៏កាចសាហាវមួយនេះ ។ យ៉ាងណាមិញ បើយោងតាមសម្តីលោកវេជ្ជបណ្ឌិត Lam Pin Min ប្រធាននៃគណៈកម្មាធិការ តំណាងអោយរដ្ឋាភិបាល (GPC) ខាងផ្នែកសុខាភិបាលអោយដឹងថា អត្រានៃការកើនឡើងអ្នកជម្ងឺ ពិតជាមានការព្រួយបារម្ភជាខ្លាំង ដូច្នេះ ដំណោះស្រាយប្រកបទៅដោយប្រសិទ្ធភាព គួរណាចេញយុទ្ធនាការរបស់ខ្លួន៕
ដោយ ៖ ពិសីប្រភព ៖ straitstimes