ព័ត៌មានអន្តរជាតិ ៖ បើយោងតាមការដកស្រង់អត្ថបទផ្សាយ ដែលទើបតែបានចេញដោយទីភ្នាក់ងារសារព័ត៌មានបរទេស ស្កាយ កាលពីវេលាល្ងាចម្សិលមិញនេះ បានគូសបញ្ជាក់អោយដឹងថា យុវសិស្សម្នាក់ ក៏កំពុងតែតស៊ូព្យាយាម ជាមួយនឹងឧកាសរស់រានមានជីវិត បន្ទាប់ពីបានព្យាយាមបាញ់សម្លាប់ខ្លួនឯង ដោយកាំភ្លើងខ្លី ក្នុងថ្នាក់រៀន នាវិទ្យាល័យ Ohio សហរដ្ឋអាមេរិក។
ប្រភពសារព័ត៌មាន ដដែល បន្ថែមថា យុវសិស្សដែលព្យាយាម ប៉ុនប៉ងធ្វើអត្តឃាតនោះ មកទល់នឹងបច្ចុប្បន្ននេះ ក៏កំពុងតែសម្រាកព្យាបាល នៅឯមន្ទីរពេទ្យ នៅក្បែរកន្លែងកើតហេតុស្របពេលដែលស្ថានភាពជម្ងឺរបស់គេ ស្ថិតនៅក្នុងសភាពធ្ងន់ធ្ងរនៅឡើយ(កំពុងតែតស៊ូព្យាយាម ជាមួយនឹងឧកាសរស់រានមានជីវិត) ។
គួរបញ្ជាក់ផងដែរថា ខណៈពេលដែលកើតមានឡើងនូវករណីខាងលើនេះ ក៏មានសិស្សានុសិស្សជាង ២០ នាក់ផ្សេងទៀតផងដែរ បានឃើញ និង ស្ថិតនៅក្នុងស្ថានភាពដ៏គួរអោយរន្ធត់មួយនេះ តែពួកគេមិនបានទទួលការគំរាមគំហែង ឬក៏រងរបួសអ្វីនោះទេ។
ដោយឡែក ភ្លាមៗនោះ ក៏មានការជម្លៀសសិស្សានុសិស្ស ចេញពីវិទ្យាល័យពីសំណាក់អាណាព្យាបាលរបស់ពួកគេ បន្ទាប់ពីទទួលបានព័ត៌មានខាងលើនេះ។ ដោយឡែក បើនិយាយពីអត្តសញ្ញាណ ជងរងគ្រោះវិញ មិនបានបញ្ជាក់ អោយដឹងនោះទេ ស្របពេលដែលឪពុកម្តាយរបស់គេ ស្នើអោយមានការរក្សាជាសម្ងាត់ ។ ហើយបើនិយាយពីមូលហេតុ ដែលនាំអោយគេ មានគំនិតធ្វើរឿងអត្តឃាតមួយនេះ ក៏មិនទាន់បានដឹងជាក់ច្បាស់ នៅឡើយទេ ស្របពេលដែលវាស្ថិតនៅក្រោមការតាមដានស៊ើបអង្កេតនៅឡើយ៕
ដោយ ៖ ពិសិដ្ឋប្រភព ៖ ស្កាយ