ក្រុងញូយ៉ក៖ ទូរស័ព្ទស្មាតហ្វូនទំនើបចុងក្រោយរបស់ក្រុមហ៊ុន Samsung បញ្ចេញលក្ខណៈពិសេស ដែលមានអេក្រង់ធំមូលវែង និងធ្វើពីកញ្ចក់ភាគច្រើន។
SquareTrade បានបង្ហើបឱ្យដឹងថា៖” ការឌីហ្សាញផ្នែកខាងក្រៅពីកញ្ចក់ស្ទើរតែទាំងស្រង់នៃទូរស័ព្ទស្មាតហ្វូន Samsung Galaxy S8 និង S8 Plus ធ្វើឱ្យទូរស័ព្ទម៉ូដែលថ្មីនេះ ស្រស់ស្អាតគួរឱ្យទាក់ទាញសម្រាប់អ្នកប្រើប្រាស់ ប៉ុន្ដែវាក៏ងាយបែកផងដែរ នៅពេលដែលធ្លាក់ត្រូវជ្រុងណាមួយ” ។
ភ្លាមៗនេះ ក្រុមហ៊ុន Samsung មិនទាន់ឆ្លើយតប ចំពោះសំណើសុំការបកស្រាយអំពីបញ្ហានេះ នៅឡើយទេ។
ទូរស័ព្ទម៉ូដែលថ្មីសន្លាងនេះ ទទួលបានការវាយតម្លៃជាវិជ្ជមានពីភ្នាក់ងារសារព័ត៌មាន AP និងកន្លែងលក់ផ្សេងទៀត។ ក្រុមហ៊ុន Samsung បានឱ្យដឹងថា ការបញ្ជាទិញជាមុនសម្រាប់ទូរស័ព្ទ S8 នេះ មានកម្រិតខ្ពស់ជាង ការបញ្ជាទិញទូរស័ព្ទ Galaxy S7 ក្នុងកម្រិត ៣០%។ ក្រុមហ៊ុននេះ មិនបានបញ្ចេញតួលេខជាក់លាក់ ចំពោះការបញ្ជាទិញជាមុននៃទូស័ព្ទម៉ូដែលថ្មីនេះទេ។ Galaxy S8 ចាប់ផ្តើមលក់ ក្នុងតម្លៃ ៧៥០$ ដែលមានតម្លៃខ្ពស់ជាង S7 ប្រហែល ១០០$។
SquareTrade បានឱ្យដឹងកាលពីថ្ងៃចន្ទថា ការប្រេះបែក បានលេចឡើង នៅលើអេក្រង់ Galaxy S8 និង S8 Plus បន្ទាប់ពីធ្លាក់ផ្កាប់អេក្រង់ នៅលើចិញ្ចើមផ្លូវកម្ពស់ ១.៨៣ ម៉ែត្រ។ ទូរស័ព្ទម៉ូដែលនេះ មានបញ្ហាប្រេះបែកដូចគ្នា នៅពេលដែលធ្លាក់ចំផ្នែកខាងក្រោយ និងជ្រុងណាមួយ។
ប៉ុន្ដែ ទូរស័ព្ទទាំងពីរម៉ូដែលនេះ អាចធន់នឹងទឹកបានយ៉ាងល្អ នៅពេលយកទៅធ្វើតេស្តទម្លាក់ក្នុងទឹក។ ទូរស័ព្ទនេះមាន នូវសម្លេងអូឌីយ៉ូរំខាន(audio distortion) ខ្លះដែរ ប៉ុន្តែបញ្ហានេះ គឺជារឿងធម្មតា និងកើតឡើងម្ដងម្កាល។ Galaxy S8 នេះ មានលក្ខណៈពិសេស ការពារជម្រាបទឹក។
SquareTrade មិនបានធ្វើតេស្ដថ្មទូរស័ព្ទម៉ូដែលនេះទេ ដែលថ្មនេះហើយ ជាប្រភពនៃបញ្ហាដែលនាំឱ្យក្រុមហ៊ុន Samsung ប្រមូលទូរស័ព្ទ Galaxy Note 7 មកវិញ កាលពីពេលកន្លងទៅ៕
ប្រែសម្រួល ៖ សារ៉ាត
ប្រភព ៖ AP