ទិន្នន័យ និងរូបភាពថ្មីបំផុតដែលត្រូវបាន NASA ចុះផ្សាយ បង្ហាញថា ក្នុងអំឡុង ២០ឆ្នាំមកនេះ ផែនដីបានប្រឈមនឹងការវាយប្រហារជាបន្តបន្ទាប់រាប់រយលើក ពីសំណាក់អាចម៍ផ្កាយ មកពីលំហអវកាស។

/

ថ្មីៗនេះ កម្មវិធី NEO (Near Earth Object) របស់ NASA បានចេញសេចក្ដីប្រកាសជារូបភាពផែនទីមួយ ដែលកត់ត្រានូវចំនួនអាចម៍ផ្កាយ ដែលធ្លាប់បានធ្លាក់មកលើផែនដី ចាប់តាំងពីឆ្នាំ ១៩៩៤ ដល់ឆ្នាំ ២០១៣។ លទ្ធផលខាងលើនេះ បានធ្វើឱ្យមនុស្សមានការភ្ញាក់ផ្អើល និងព្រួយបារម្ភ ព្រោះថា កន្លងមក មនុស្សភាគច្រើនយល់ថា ផែនដី មានសុវត្ថិភាពបំផុត។

/

ជាក់ស្ដែង ក្នុងរយៈពេល ២០ឆ្នាំមកនេះ ធ្លាប់មានអាចន៍ផ្កាយឆេះ ផ្សេងៗគ្នា រហូតដល់ ៥៥៦ករណី បានហោះចូលមកបរិយាកាសផែនដី និងរាយប៉ាយគ្រប់ទីកន្លែង។ ទិន្នន័យនេះ ប្រមូល បានតាមរយៈម៉ាស៊ីនសេនសឺររបស់ទីភ្នាក់ងារអវកាសអាមេរិក ដែលដាក់នៅក្នុងតំបន់ជាច្រើន ក្នុងពិភពលោក។

/

យោងតាមផែនទីនេះ បណ្ដាអាចម៍ផ្កាយតូចៗ បានហោះមកកាន់ផែនដី ជាបន្តបន្ទាប់ ហើយវាមានភាពខុសគ្នា ពីពេលវេលា ការប៉ះទង្គិច ឬកម្រិត និងថាមពលបំផ្លាញ។ ពណ៌និមួយៗនៃដុំចុចនៅលើផែនទី បង្ហាញអំពីពេលវេលាដែលបណ្ដាអាចម៍ផ្កាយធ្លាក់មកកាន់ផែនដី។ ចំណែកកម្រិតធំ តូច នៃដុំចុចទាំងនោះ បង្ហាញអំពីថាមពល ឬកម្លាំងរបស់អាចម៍ផ្កាយ។

ជាក់ស្ដែង បណ្ដាគ្រាប់ចុចតូចបំផុត នៅលើផែនទី គឺស្មើនឹងថាមពលប្រហែល ១GJ (GJ គឺ Giga Joules)។ គ្រាប់ចុចធំបំផុត គឺស្មើនឹងថាមពល ១លាន GJ ពោលគឺស្មើនឹងកម្លាំងម្សៅផ្ទុះ TNT ១លានតោន។

/

ប៉ុន្ដែ ជាការសំណាងបំផុត គឺថា ផែនដី ត្រូវបានការពារដោយបរិយាកាស។ ដូច្នេះ បណ្ដាអាចម៍ផ្កាយតូចៗ តែងតែត្រូវឆេះគ្មានសល់ មុនពេលវាអាចធ្លាក់មកដល់ដី។  ករណីមួយ ដែលត្រូវបានគេកត់សម្គាល់ នោះគឺការប៉ះទង្គិចដ៏ខ្លាំង​ក្លារបស់អាចម៍ផ្កាយ Chelyabinsk កាលពីឆ្នាំ ២០១៣។ អាចម៍ផ្កាយនេះ បានបំផ្លាញកញ្ចក់បង្អួចរបស់អាគារជាង ៧.២០០កន្លែង នៅក្នុងទីក្រុងចំនួន ៦ របស់រុស្ស៊ី និងបានធ្វើឱ្យមានរបួសដល់មនុស្សជាង ១.៥០០នាក់។

/

ក្រុមអ្នកជំនាញរបស់ NASA ឱ្យដឹងថា ផែនទីនេះ អាចនឹងបង្ហាញថា អនាគតខាងមុខ នឹងមានការរំខានជាច្រើន ពីអាចម៍ផ្កាយ ដូច្នេះ NASA និងទីភ្នាក់ងារអវកាសនានា គួរតែចាប់ផ្ដើមរៀបគម្រោង ទប់ទល់នឹងពួកវា៕

 

ប្រែសម្រួលដោយ ៖ តារាប្រភព ៖ Earthsky